Փաստ ինֆո

Գիշերը կրակոցներ են հնչել Կոտայքի մարզի Արամուս բնակավայրում գտնվող ռեստորաններից մեկում, ինչի հետևանքով մարմնական վնասվածքներ է ստացել 47-ամյա տղամարդ։ Մամուլում շրջանառվող տեղեկությունների համաձայն՝ ռեստորանում վիճաբանություն է եղել ՀՀ ԶՈՒ ԳՇ պետի նախկին տեղակալ Տիրան Խաչատրյանի մասնակցությամբ, որի ընթացքում վերջինս կրակոցներ է արձակել, դիմել փախուստի։ «Ժողովուրդը» գրել է նաև, որ Տիրան Խաչատրյանն արդեն հայտնաբերվել և ձերբակալվել է։ «Փաստինֆո»-ն փորձեց կապ հաստատել Տիրան Խաչատրյանի հետ, սակայն Խաչատրյանը հեռախոսազանգը թողեց անպատասխան։ ՀՀ ՆԳՆ լրատվական ծառայությունից հաստատեցին դեպքը՝ թեև զերծ մնացին անձանց անուններ հնչեցնելուց։ Պաշտոնական աղբյուրի փոխանցմամբ՝ հունվարի 11-ին՝ ժամը 23.00-ին, ՀՀ ՆԳՆ ոստիկանություն հաղորդում է ստացվել, որ Արամուս գյուղում վիճաբանություն է։

«ժամը 23.39-ին «Աբովյան» ԲԿ-ից հաղորդում է ստացվել, որ Արամուս գյուղից «աջ դաստակի սալջարդ, պատռած վերք սալի ջլերի վնասումով» ախտորոշմամբ շտապօգնության խումբն իրենց մոտ բուժօգնության է տեղափոխել 1977թ ծնված մի տղամարդու»,- հայտնեցին ՆԳՆ-ից՝ հավելելով, որ հանգամանքները պարզվում են: Կազմված փաստաթղթերն ուղարկվել են Աբովյանի քննչական բաժին՝ քրեական վարույթ նախաձեռնելու հարցը քննարկելու համար: ՀՀ Քննչական կոմիտեից էլ «Փաստինֆո»-ին հայտնեցին, որ դեպքի առթիվ քրեական վարույթ է նախաձեռնվել՝ ՀՀ քրեական օրենսգրքի մի քանի հոդվածներով՝ ՀՀ քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (Խուլիգանությունը, որն իրականացվել է մի խումբ անձանց կողմից, տեղեկատվական կամ հաղորդակցական տեխնոլոգիաներն օգտագործելով), 335-րդ հոդվածի 1-ին մասով (Ապօրինի կերպով հրազեն կրելու ) և 167-րդ հոդվածի 2-րդ մասի 8-րդ կետով (զենքի գործադրմամբ առողջությանը միջին ծանրության վնաս պատճառելը)։

Կրակոցների հետևանքով տուժած անձն արդեն տուժող է ճանաչվել։ Նախաքննության ելնելով՝ ՔԿ-ից այլ մանրամասներ չհայտնեցին, միայն նշեցին, որ քննության որոշակի փուլում մանրամասներ կհայտնեն՝ պայմանավորված հանրային հետաքրքրությամբ։ Ձերբակալված է արդյոք Խաչատրյանը, թե ոչ՝ ՔԿ-ն չի մանրամասնում։

Հեղինակ՝ Իզաբել Սահակյան

Աղբյուր` Փաստինֆո