Փաստ ինֆո

Այն դեպքում, երբ քաղաքացին տեսանկարահանող կամ լուսանկարահանող սարքով հայտնաբերված ճանապարհային երթևեկության կանոնների խախտումների դեպքում roadpolice am կայքում առցանց դիմում ներկայացնի՝ պահանջելով վարչական ակտն ուղարկել իր նշած էլեկտրոնային հասցեով և վարչական մարմինը սահմանված կարգով դա անի, ապա տուգանքը կնշանակվի սահմանված գումարից 20 տոկոսով պակաս։ Համապատասխան որոշումն ընդունվեց Գործադիրի այսօրվա նիստում։

Նախագիծը ներկայացնելիս ՆԳ նախարար Վահե Ղազարյանը նշեց, որ փաթեթով նաև նախատեսված է, որ եթե վարչական ակտի հասցեատերը ծանուցումը ստանալուց հետո 15 օրվա ընթացքում վճարի տուգանքի առնվազն 70 տոկոսը, ապա վճարման պարտավորությունը կհամարվի պատշաճ կատարված։ «Եթե որոշումը ծանուցվել է առնցանց, ապա քաղաքացին կօգտվի նաև նախորդ կարգավորմամբ սահմանված 20 տոկոսի կետից»,-շեշտեց նախարարը։

Արդեն իսկ խախտումների գործով կայացված, դեռևս չկատարված, ինչպես նաև հարկադիր կատարման փուլում գտնվող վարչական ակտերի պարագայում օրենքն ուժի մեջ մտնելուց հետո եռամսյա ժամկետում տուգանքի 50 տոկոսը վճարելու դեպքում պարտավորությունը կհամարվի կատարված, այսինքն՝ տուգանքը կհամարվի վճարված։

Ղազարյանը նշեց, որ դատարանների ծանրաբեռնվածության խնդիրը ևս փաթեթով կարգավորվելու է։

Նախագծի հիմնավորման մեջ այդ առնչությամբ նշված է․ «Հաշվի առնելով այն հանգամանքը, որ ներկայումս ՀՀ ՆԳՆ ոստիկանության և դրա ենթակայության տակ գտնվող մարմինների մասնակցությամբ դատական վեճերը և այդ գործերի լուծման կարգը բավականաչափ կանոնակարգված է և բացակայում է իրավունքի մասին վեճը, համապատասխան գործերի մինչդատական օբյեկտիվ վերանայումը չի կարող չհանգեցնել դատարանների ծանրաբեռնվածության նվազմանը։

Ամփոփելով վերոգրյալը՝ կարող ենք արձանագրել, որ ՀՀ ՆԳՆ ոստիկանության և դրա ենթակայության տակ գտնվող վարչական մարմինների դերը վարչարարության և դրա արդյունքում կայացվող վարչական ակտերի վերանայման հարցում բարձրացնելու դեպքում հնարավոր կլինի լուծել ՀՀ վարչական դատարաններում առկա գերծանրաբեռնվածության խնդիրը»։

Աղբյուր` Փաստինֆո