Փաստ ինֆո

Աշխատանքի և սոցիալական հարցերի նախարարությունն առաջարկվում է աջակցել 2023 թվականին Արցախից բռնի տեղահանված անձանց՝ ձեռք բերելու գործատուի կողմից ներկայացված պահանջներին համապատասխան մասնագիտական հմտություններ, կարողություններ և աշխատանքային փորձ՝ գործատուի մոտ առկա թափուր աշխատատեղը համալրելու նպատակով։ Համապատասխան որոշումն ընդունվեց Կառավարության այսօրվա նիստում։

Նախագծով առաջարկվում է Արցախից բռնի տեղահանված անձանց զբաղվածության ապահովման 3 ուղղություն՝

1. մասնագիտական ուսուցում և աշխատանքի տեղավորում

2. աշխատանքային փորձի ձեռքբերում և աշխատանքի տեղավորում,

3. մասնագիտական ուսուցում, աշխատանքային փորձի ձեռքբերում և աշխատանքի տեղավորման։
Առաջին ծրագրով առաջարկվում է կազմակերպել մինչև 5 ամիս տևողությամբ մասնագիտական ուսուցում, որի նպատակով շահառուին ամսական կտրվածքով կվճարվի ուսման վարձի փոխհատուցում՝ յուրաքանչյուր ամսվա համար առավելագույնը 50000 դրամ և կրթաթոշակ` ամսական 50000 դրամի չափով։

Մասնագիտական ուսուցումն ավարտելուց հետո գործատուի և շահառուի միջև առնվազն 3 ամիս ժամկետով կնքվելու է աշխատանքային պայմանագիր։ Այդ դեպքում գործատուն ևս կստանա ամսական 50000 դրամ՝ 3 ամիս ժամկետով՝ շահառուի աշխատավարձից հաշվարկվող եկամտային հարկը, դրոշմանիշային վճարը և օրենքով սահմանված դեպքերում սոցիալական վճարը փոխհատուցելու համար։
Եթե մասնագիտական ուսուցումն ավարտելուց հետո աշխատանքային պայմանագիր չկնքվի կամ կնքված պայմանագիրը մինչև 3 ամիսը լրանալը լուծվի, ապա գործատուն պարտավորվում է ամբողջությամբ հատուցել շահառուին մասնագիտական ուսուցման ընթացքում տրամադրված գումարը։

Առաջարկվող երկրորդ ծրագրով գործատուի և աշխատողի միջև պետք է կնքվի առնվազն 6 ամիս ժամկետով աշխատանքային պայմանագիր․ առաջին 3 ամիսներին նախատեսվում է աշխատանքային փորձառության կազմակերպում, որի շրջանակում գործատուին 3 ամիս ժամկետով կտրամադրվի ամսական 165000 դրամ՝ շահառուի աշխատավարձը, հաշվարկվող եկամտային հարկիը դրոշմանիշային վճարն ու մյւոս պարտադիր վճարումներն իրականացնելու համար։

Աջակցության երրորդ ծրագրով նախատեսվում է մինչև 5 ամիս տևողությամբ մասնագիտական ուսուցման կազմակերպում, որի նպատակով ուսուցման ամբողջ ժամանակահատվածում շահառուին կվճարվի ամսական 50 000 դրամ՝ որպես ուսման վարձի փոխհատուցում և նույնքան էլ կրթաթոշակ։

Մասնագիտական ուսուցումն ավարտելուց հետո գործատուի և շահառուի միջև առնվազն 6 ամիս ժամկետով պետք է կնքվի աշխատանքային պայմանագիր։

Այս դեպքում ևս առաջին 3 ամիսների ընթացքում շահառուն կանցնի աշխատանքային փորձառություն, իսկ գործատուն երեք ամիս ժամկետով ամսական 165000 դրամ կստանա՝ շահառուին աշխատավարձ վճարելու, ինչպես նաև աշխատավարձից հաշվարկվող եկամտային հարկը, դրոշմանիշային վճարը և օրենքով սահմանված դեպքերում` սոցիալական վճարը վճարելու համար։

Վարչապետը նկատեց՝ նշված ժամկետները երաշխավորված ծրագրերի համար պահանջվող վեց ամիսը չեն ներառում, ինչո՞ւ է սահմանափակվում այդ դեպքում ժամկետը։ Սոցապ նախարարը համաձայնեց՝ 5 ամիսը կդարձվի վեց ամիս։

Նախագծով առաջարկվում է ծրագրերում ընդգրկել շուրջ 1000 շահառուի։ Պահանջվող գումարը կկազմի շուրջ 816 մլն դրամ։

Աղբյուր` Փաստինֆո