Փաստ ինֆո

Մեկ օրում՝ երկու սպայի մահվան դեպք, երկուսն էլ՝ նույն բանակային կորպուսում։

Ընդ որում՝ երկու դեպքում էլ այդ մասին նախ հայտնի է դարձել մամուլին, եւ հետո միայն ՊՆ-ն ստիպված է եղել պաշտոնապես հաստատել։

Նախ հայտնի դարձավ, որ հունվարի 9-ին՝ ժամը 06:20-ի սահմաններում, մարտական դիրքում հայտնաբերվել է պայմանագրային զինծառայող Կարեն Արայիկի Կարապետյանի դին՝ հրազենային վնասվածքով: Կարենը 24 տարեկան էր, Արագածոտնի մարզի Ոսկեվազ համայնքից ընտանիքի ավագ որդին։ Ամուսնանալ դեռ չէր հասցրել։

Ոսկեվազ համայնքի ղեկավար Երվանդ Համբարձումյանը «Փաստինֆո»-ին պատմել է, որ Կարենն ավարտել էր Ճարտարարաշինարարական համալսարանը, ապա՝ Վազգեն Սարգսյանի անվան ռազմական համալսարանը, կոչումով լեյտենանտ։ Ծառայության էր անցել ընդամենը 6 ամիս առաջ։

Դեպքի առթիվ ՔԿ-ում քրեական վարույթ է նախաձեռնվել սպանության հատկանիշներով. Նախնական վարկածով հրազենային վիրավորումը հասցվել է մարտական հերթապահության մեջ գտնվող ժամկետային զինծառայողի կողմից։ ՔԿ-ն նույն օրը հայտարարեց կասկածյալի ձերբակալության մասին։

Ավելի ուշ արդեն հայտնի դարձավ, որ կրկին Վարդենիսի տարածքում տեղակայված մարտական դիրքում՝ ժամը 11,30-ի սահմաններում, հրազենային մահացու վիրավորմամբ հայտնաբերվել է պայմանագրային զինծառայող, կոչումով ավագ լեյտենանտ Միքայել Դանիելյանի մարմինը։ Դանիելյանի մահվան հանգամանքները, սակայն, հանելուկային են՝ նրա հարազատների համար։

Իրավապահները հայտնում են, որ ըստ նախնական տվյալների՝ զինծառայողը մահացու վնասվածքն ստացել է իրեն ամրակցված ինքնաձիգից կզակի շրջանում արձակած կրակոցի հետևանքով։ Ըստ նախաքննական մարմնի նա ինքնասպան է եղել եւ կայազորային քննչական բաժնում քրեական վարույթ է նախշաձեռնվել ինքնասպանության հասցնելու հատկանիշներով։

Միքայել Դանիելյանը Գեղարքունիքի մարզի Վահան գյուղից էր, կոչումով՝ ավագ լեյտենանտ, 29 տարեկան։ Նա ամուսնացած էր, ուներ երկու երեխա՝ որդի և դուստր։ Տևական ժամանակ է արդեն, ինչ ծառայում էր բանակում։

Վահան համայնքի վարչական ղեկավար Արշակ Մկրտչյանը «Փաստինֆո»-ին պատմել է, որ Միքայելը շատ օրինակելի ընտանիքից է, ամբողջ գյուղը նրան սիրել, հարգել է, եւ կատարվածից զարմացած են, հարցերը՝ շատ։

Երկու սպայի մահվան դեպքն էլ տեղի է ունեցել Գեղարքունիքի մարզում՝ Գարեգին Պողոսյանի ենթակայության երկրորդ բանակային կորպուսում։ Դեպքից հետո ՀՀ ՊՆ-ն հաղորդել էր, որ ԳՇ պետ Էդվարդ Ասրյանը հանդիպում է ունեցել բանակային երկրորդ կորպուսի կազմի և հրամանատարի հետ՝ կարգադրելով հետևել կանոնադրային հարաբերություններին, պահպանել անվտանգության կանոնները, հետևողականորեն իրականացնել կարգապահության բարձրացմանն ուղղված բոլոր միջոցառումները։

Ի. Ս.

Աղբյուր` Փաստինֆո