Փաստ ինֆո

Ադրբեջանից և բանակցային գործընթացից մեր ակնկալիքն այն է, որ պայմանավորվածությունները ընդունվեն Ադրբեջանի կողմից և դրանց մասին հրապարակային խոսի: Եթե դրանք չեն ընդունվում՝ նշանակում է, որ պայմանագիրը տվյալ պահին չի կարող ստորագրվել։ Այս մասին լրագրողների հետ զրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը:

«Հայաստանը շարունակելու է պնդել այդ սկզբունքները: Վերջին տարբերակում, որն ուղարկվել է Բաքու, կրկին տեղ են գտել այն դրույթները, որոնք մեզ համար շատ սկզբունքային են»,- նշել է Խանդանյանը։

Անդրադառնալով «Զանգեզուրի միջանցքի» շուրջ վերսկսված խոսակցություններին ու Հայաստանի կողմից Ադրբեջանի բեռների շարժի հնարավոր դյուրացման ռեժիմին՝ նա նշեց, որ դա կարևոր սկզբունքներից մեկն էր։

«Մեզ համար շատ կարևոր է ապաշրջափակման գործընթացը, բազմիցս ասել ենք, որ այդ գործընթացն ունի պարամետրեր և սկզբունքներ։ Այդ սկզբունքներն են՝ երկրների իրավազորությունը, օրենսդրությունը և հավասարությունը։ Այս սկզբունքները պետք է արձանագրվեն համաձայնագրում, դրանց շուրջ եղել է համաձայնություն նախորդ տարվա հուլիսին: Դրանից հետո միջանցքային տրամաբանության մասին խոսելը մեզ համար անընդունելի է: Այս սկզբունքների շրջանակներում հնարավոր է նախատեսել ավտոմեքենաների և քաղաքացիների անցման որակի դյուրացում, որպեսզի այն վախերը և ռիսկերը, որոնք կան թե մեզ մոտ, թե Ադրբեջանում, հնարավոր լինի որոշակիորեն կառավարել»,- նկատել է Խանդանյանը։

Նա նաև ընդգծեց, որ պարամետրերը պետք է բանակցել, քննարկել: «Մեր ակնկալիքն է, որ Ադրբեջանը վերահաստատի իր համաձայնությունը և հնարավոր կլինի աշխատանքային կարգով քննարկել այդ պարամետրերը»:

Հստակեցնող հարցին, թե դյուրացված ռեժիմ ասելով ինչ են հասկանում, նա նշեց, որ կա մի շարք երկրների փորձը։

«Ոչ միայն մաքսային վերահսկողությունն է այստեղ կարևոր, այլև՝ անձնագրային, ֆիտոսանիտարական և մյուս ընթացակարգերը, որոնք պետք է պահպանվեն, ինչպես պահպանվում են ՀՀ-ն հատած ցանկացած գնացքի կամ մեքենայի դեպքում։

Երբ այն սկզբունքները, որոնք արտահայտվում են խաղաղության պայմանագրի մեր տարբերակում, Ադրբեջանի կողմից ընդունելի լինեն, այդ ժամանակ խաղաղության պայմանագիրը հնարավոր կլինի ստորագրել, այդ սկզբունքներից մեկը նաև տարածքային ամբողջականության անվերապահ ճանաչումն է»,- ասաց Խանդանյանը։

Աղբյուր` Փաստինֆո