Փաստ ինֆո

Վարչապետը ուզում էր ինչ-որ մարզպետներից ձերբազատվել, և անել այնպես, որ դա հանրությանը մի քիչ հիմնավոր թվա։ Այս մասին «Փաստինֆոյի» հետ զրույցում ասաց «Իրազեկ քաղաքացիների միավորում» ՀԿ ծրագրերի ղեկավար Դանել Իոաննսյանը։

Հարցին, թե արդյոք կարելի է ասել, որ հիմնավոր էր՝ նա պատասխանեց, որ հանրության զգալի մասի համար՝ այո։

«Հարցը հետևյալն է, իրականում այս բոլոր դպրոցները 4-րդ կարգի շինություններ են՝ իրենց բարդության աստիճանով։ 4-րդ կարգի շինությունները հանձնելուց 10 հոգանոց հանձնաժողով է ստեղծվում, նրանք հանձնում և ընդունում են աշխատանքները։ Հիմա հարցն այն է, թե արդյո՞ք այդ հանձնաժողովներում ոչ ոք այդ խնդիրները չի տեսել, բոլոր նրանք, ովքեր ստորագրել են այդ աշխատանքների հանձնման ու ընդունման ակտերի տակ՝ խնդիրներ չե՞ն ունենալու»,- նկատել է Իոաննիսյանը՝ ավելացնելով՝ «որպես հանրություն, պետք է պահանջենք, որ այդ հանձնաժողովի անդամներն ունենան խնդիրներ, որովհետև հանձնում ընդունում ո՞վ է անում այս երկրում, վարչապետը՞»։

Նրա խոսքերով՝ պետք է նաև ուսումնասիրել, թե արդյոք այդ մրցույթների տեխառաջադրանքների մեջ խնդիրները նորմալ ձևակերպված են, թե ոչ, ու արդյոք դրանց համապատասխան են կատարվել շինաշխատանքները։ «Եթե ներմալ է գրված ու ի հեճուկս դրա է կատարված աշխատանքը, ապա այդ 10 հոգանոց միջգերատեսչական ընդունող հանձնաժողովի անդամներին պետք է հարցեր ուղղել ու հասկանալ, թե ոնց են ընդունել»,- նշել է ԻՔՄ ծրագրերի ղեկավարը։

Իոաննիսյանը նաև ընդգծեց, որ սրանով Փաշինյանը փորձում է ցույց տալ հանրությանը, որ ինքը կապ չունի կոռուպցիայի հետ։ «Փաշինյանի համար ակնհայտ է, որ հանրության մոտ այլևս չկա այն պատրանքը, թե Հայաստանում կոռուպցիա չկա, հիմա Փաշինյանը փորձում է համոզել հանրությանը, որ ինքն այդ կոռուպցիայի մեջ չկա, իսկ այստեղ կոռուպցիոն ռիսկերն ակնհայտ են։ Միաժամանակ, այն մարզպետներից, որոնցից ուզում էր ձերբազատվել՝ ձերբազատվեց»։

Աղբյուր` Փաստինֆո