Փաստ ինֆո

Այս գործը ոտքից գլուխ սարքած է, Ձեզ չեն հարգում նախաքննության մարմինները, որ այսպիսի գործ են սարքել բերել, Դուք ստիպված փորձում եք իրենց հետևից մաքրել։ Այս մասին դատական նիստում հայտարարեց Արմեն Աշոտյանը՝ դիմելով դատավորին։

«Փաստինֆո»-ի թղթակցի հաղորդմամբ՝ մինչ Արմեն Աշոտյանի խափանման միջոցի հարցին անդրադառնալը՝ դատարանը հերթական անգամ քննարկման առարկա է դարձրել տուժող Գալինա Հարությունյանի՝ գործի քննությանը մասնակցության հարցը։  Խնդիրն այն է, որ Գալինա Հարությունյանը, որը սույն գործով ներգրավված է որպես տուժող ՍՊԸ-ի օրինական ներկայացուցիչ, գործով նկարագրված ենթադրյալ հանցագործության կատարման ժամանակ արդեն իսկ դադարել էր պաշտոնավարել, ավելին՝ այժմ ՍՊԸ-ն լուծարվել է։ Նրա ներկայացուցիչը միջնորդեց՝ դադարեցնել նրա կարգավիճակը՝ սույն գործով ։ Պաշտպանության կողմը միացավ միջնորդությանը։ Աշոտյանի պաշտպան Տիգրան Աթանեսյանը նկատեց՝ Գալինա Հարությունյանը կարող է տուժող լինել միայն այն դեպքում, եթե ինքն անձամբ է տուժել։ Փաստաբանը պնդեց, որ լուծարված ՍՊԸ-ն չի կարող տուժող լինել քրեական գործով, հետևաբար, տիկին Գալինան էլ՝ չի կարող տուժողի ներկայացուցիչ լինել։

«Կներեք, ես հասկանում եմ, թե ինչ անշնորհակալ իրավիճակում եք Դուք հայտնվել, բայց սա հերթական անգամ ապացուցում է, որ խոսքը քաղաքական հետապնդման մասին է։ Սա իրավաբանության հետ կապ չունի։ Թեև Ձեր դուրը չի գալիս՝ մենք ինչ ենք ասում, սակայն դուք էլ ապացուցում եք այն, ինչ մենք ենք ասում»,- նշեց Աթանեսյանը։

Հայտարարությամբ հանդես եկավ նաև Արմեն Աշոտյանը՝ նշելով, որ այս գործը նախաքննության փուլում առնվազն սարքած գործ է։ Նրա հայտարարության ժամանակ նախագահող Վահե Դոլմազյանն ընդհատեց՝ պահանջելով նայել ոչ թե դահլիճի կողմը, այլ իրեն՝ դատարանին։ Աշոտյանն ընդդիմացավ՝ նշելով, որ որևէ իրավական հիմք չկա՝ դատավորին նայելով ելույթ ունենալու։

«Ես անգամ չեմ բերում այն փաստարկը, որ հաշվի առնելով Ձեր պարբերաբար կողմնակալ ցայտուն դարձող վերաբերմունքը, ձեզ նայելով սկսում եմ Ձեր հետևը Նիկոլ Փաշինյանին տեսնել։ էլ չեմ խոսում վերաբերմունքի մասին... Տեսե՞լ եք անհարգալից վերաբերմունք Ձեր նկատմամբ, բայց ես պարտավոր չեմ Ձեզ նայել։ Կարող եք դահլիճից հանել կալանավոր քաղբանտարկյալ Աշոտյանին՝ Ձեզ չնայելու համար... Позорьтесь до конца»,-ասաց նա։

Ըստ Աշոտյանի՝ այս քննարկումը ապացուցում է, որ այնքան բան չկա քննարկելու, որ քննարկում են, թե ինքն ինչ պարբերականությամբ դատավորի վրա հայացքներ նետի։

«Այս գործը ոտքից գլուխ սաքրած է, Ձեզ չեն հարգում նախաքննության մարմինները, որ այսպիսի գործ են սարքել բերել, ու Դուք ստիպված փորձում եք իրենց հետևից մաքրել։ Դա նույնն է, որ խաշ կերած գնաս ստոմատոլոգի մոտ, նույնն է, թե թելով ներքնաշորով մտնես եկեղեցի, կամ չլողոցած գնաս սիրուհուդ մոտ, անհարգանքի նշան է, այս գործն այ այդպես սարքած գործ է, խաշ կերած, չլողացած ու թելով ներքնազգեստով, կներեք, ու բերել են, Ձեզ են տվել»,-ասաց նա։

Գալինա Հարությունյանի՝ տուժողի օրինական ներկայացուցչի լիազորությունները դադարեցնելու մասին միջնորդության լուծումը հետաձգվեց։ Հաջորդիվ՝ դատարանում քննարկվում է Արմեն Աշոտյանի խափանման միջոցի հարցը։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո