Փաստ ինֆո

Բոլորս տեսանք վարչապետի այցերի արդյունքում հրաժարականներ և համապատասխան պաշտոնյաների դեմ կիրառված սանկցիաներ՝ այն առումով, որ թերի խատանքն անպայման պետք է ունենա իր հետևանքները։ Այս մասին հրավիրված ասուլիսում ասաց ՀՀ արդարադատության նախարար Գրիգոր Մինասյանը։

Նրա խոսքով՝ քրեական վարույթներ դեռևս հարուցված չեն, բայց մեր իրավապահները, այս դեպքում՝ Հակակոռուպցիոն կոմիտեն, ուսումնասիրում են, որ հասկանան՝ արդյոք այդ մրցույթի հայտարարման տեխնիկական առաջադրանքներում, այնուհետև, եթե աշխատանքը հանձնման-ընդունման ակտերով ստորագրված է, կա՞ այդ տեխնիկական առաջադրանքի և հանձնման-ընդունման ակտի միջև անհամապատասխանություն, թե՝ ոչ։ Եթե առկա լինեն անհամապատասխանություններ, ապա քրեական վարույթներ կլինեն։

«Ինչ վերաբերում է մնացած պրոցեսներին, կարծում եմ, որ շատ նորմալ գործընթաց է և երբ ղեկավարը տեսնում է, որ որևէ գերատեսչություն թերանում է, բնական է, որ պետք է լինեն հետևանքներ։ Շատ հաճախ այլ պայմաններում կամ նախկինում դա կարող էր լինել թաքնված և ոչ բացահայտ, ի ուրախություն ինձ և կարծում եմ՝ մեր բազմաթիվ քաղաքացիների՝ թափանցիկ, բաց տեղի են ունենում գործընթացներ։ Դա նաև ազդակ է բոլոր գերատեսչություններին, գերատեսչությունների ղեկավարներին, նախարարներին, անձամբ ինձ, թե ինչպես է պետք աշխատել և ինչ նոր նշաձող է սահմանվում ՝ երկրի ղեկավարի կողմից»,- նշեց Մինասյանը։

Հարցին՝ իրեն ինչ ճակատագիր է սպասվում, արդյո՞ք իր հրաժարականի հարցը կա, թե՝ ոչ, Մինասյանը վստահեցրեց՝ այդ տեղեկությունները՝ բոլորը սուտ են։

Աղբյուր` Փաստինֆո