Փաստ ինֆո

Կադրային ազատումների շքերթը կշարունակվի, ընտրությունների փուլի մեկնարկը տրված է։ Այս մասին «Փաստինֆոյի» հետ զույցում ասաց քաղտեխնոլոգ Կարեն Քոչարյանն՝ անդրադառնալով Նիկոլ Փաշինյանի մարզեր կատարված այցերին, որոնց հաջորդեցին Լոռու և Արմավիրի մարզպետների, ինչպես նաև Քաղաքաշինության կոմիտեի ղեկավարի պաշտոնանկությունները։

Ընդ որում, այցերն ուղեկցվում են Փաշինյանի ցուցադրական դժգոհություններով՝ կատարված շինարարական աշխատանքի վերաբերյալ։ Քոչարյանն ընդգծեց, որ սպասվող կադրային փոփոխությունների մասին մեդիան մինչև այս բավական շատ էր գրել։

«Ես կարծում եմ ընտրությունների փուլին ստարտ է տրված, դրա համար պետք է փոխվեն այն բոլոր մարդիկ, որոնք վստահելի չեն, թեև Հայաստանի ներկա ղեկավար կոչվողի դեպքում հարց է, թե նա ունի՞ վստահելի մարդ ընդհանրապես։

Ամեն դեպքում՝ Փաշինյանը քիչ թե շատ վերադարձել է հայտնի բանաձևին՝ «պոլի փետ լինի՝ մերը լինի»։ Այսինքն, պետք է բոլոր տեղերում լինեն ՔՊ-ականներ, ընդ որում, ոչ միայն իրենց լոյալ մարդիկ, այլև հենց ՔՊ-ականներ։ Ավելին, մարզպետները եթե անգամ ՔՊ-ական են՝ պետք է լինեն այնպիսին, որ կարողանան ապահովել ընտրությունների ցանկալի արդյունքները։ Այսինքն, ազատվում են ոչ միայն ոչ ՔՊ-ականներից, այլև թույլ ՔՊ-ականներից»,- ասել է քաղտեխնոլոգը։

Այսօր արդեն պարզ դարձավ, որ Փաշինյանի այցերի ընթացքում ի հայտ եկած անորակ շինարարական աշխատանքների վերաբերյալ տվյալները քննության առարկա են դարձել հակակոռոպցիոն կոմիտեում, ինչի մասին հայտնել է գործադիր իշխանությունը՝ ի դեմս արդարադատության նախարարի, որը պետք է որ որեւէ առնչություն չունենա նախաքննական մարմնի աշխատանքների հետ։ Արդյոք այս պարագայում գործ չունենք նաեւ իշխանության տարանջատման հերպթական դրսեւորման հետ։ Մեր դիտարկմանն ի պատասխան Կարեն Քոչարյանը նկատեց, որ այդ նախարարությունը, ինչպես շատ այլ նախարարություններ այս իշխանության պարագայում, ինչ-որ զվարճալի, իբր, պետական օրգաններ են։ «Արդարադատության նախարարը խոսում է այն մասին, թե իբր կոռուպցիա չկա ու մոռանում է, որ կոռուպցիայի հիմքում մեկ աղբյուրից գնումներն են, իսկ պետական գնումների մեծ մասը հիմնականում կատարվել են մեկ աղբյուրից, դա ամենամեծ կոռուպցիոն ռիսկն է, ուրեմն էլ ինչի՞ մասին է խոսքը։ Արդարադատության նախարարը կարդում է իր ընկերոջ՝ Ձմեռ պապիկին գրած նամակը։ Այսպիսի բաներով են զբաղված մարդիկ, հետևաբար ինչ արդարադատության նախարարություն»։

Աղբյուր` Փաստինֆո