Փաստ ինֆո

Ես մեծ ջանքեր եմ գործադրում, որ գամ, մասնակցեմ նիստերին, որովհետև ինձ համար անընդունելի է, որ ասում եք` թե ես խուսափում եմ։ Այս մասին դատական նիստում հայտարարեց ՊԵԿ նախկին նախագահ Գագիկ Խաչատրյանը, որը դատարանում անվասայլակով էր և գտնվում էր բժիշկների հսկողության ներքո։

Գագիկ Խաչատրյանը, միանալով դատախազին բացարչկ հայտնելու միջնորդությանը, նշեց, որ ի սկզբանե՝ քրեական գործի շրջանակներում ինքը ներկայացել է քննիչի առաջին իսկ զանգից, ներկայացել է երկու պատճառով, առաջինը, որ ապացուցի, թե ով է մեղավոր, ով՝ ոչ, ընդ որում, ունեցել է չներկայանալու հնարավորություն։ Խաչատրյանի խոսքով՝ դատավարության ընթացքում պարզ տեսանք, թե ինչ է կատարվում։

«Եթե դատաբժշկական հանձնաժողովը ամիսներ շարունակ իրականացնում է տարբեր ստուգումներ, եթե ոչ մի արժեք չունի, ինչո՞ւ եք ուղարկում։ Ինչո՞ւ եք ուղարկում ձեր հսկողության տակ առողջապահության նախարարության բժշիկների մոտ, որ եզրակացություն տան ու չեք կարդում, կամ եթե կարդում եք, հետևություն չեք անում։ Իմաստը ո՞րն է, ձեր նպատակը ո՞րն է։

Ինչի՞ եք սպասում, ես չեմ հասկանում։ Համբերատար սպասում եմ, առարկություն չեմ արել, ինչ խաղի կանոններ հաստատում եք, այդ կանոններով խաղում ենք։

60-ից ավելի նիստերին ո՞վ է ներկայացել, մեծ ջանքեր եմ կիրառում, որ մասնակցեմ նիստերին։

Ես մեծ ջանքեր եմ գործադրում, որ գամ, մասնակցեմ նիստերին, որովհետև ինձ համար անընդունելի է, որ ասում եք` թե ես խուսափում եմ»,- ասաց Խաչատրյանը՝ նշելով, որ իրեն այդկերպ նույնիսկ վիրավորում են․ «Պատկերացնու՞մ եք` 10-ից ավելի ՄՌՏ եմ անցել` սիրողական, ըստ ձեզ, դիտավորյալ»։

Դատական նիստը հետաձգվեց՝ պայմանավորված Խաչատրյանի առողջական վիճակով։

Հիշեցնենք, որ Գագիկ Խաչատրյանը և Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։

Ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ» ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված «Հիդրոապարատ» ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ: Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո