Փաստ ինֆո

Իռլանդիայի բնակչուհին վախեցել է բժշկի եզրակացությունից, վնասակար սնունդը փոխարինել տնական կերակուրով և նիհարել 57 կիլոգրամով: Այս մասին հայտնում է Belfast Live-ը։

Անտրիմ կոմսության Բալիմենա քաղաքից 45-ամյա Ջուդի Գիբսոնը սկսել է ավելորդ քաշ հավաքել 11 տարեկանում՝ հորը կորցնելուց հետո: Նա ծանր էր տանում կատարվածը և սկսել էր շատ ուտել՝ ցավը խեղդելու համար։ Ընթրիքից հետո նա պարբերաբար ուտում էր չիպսեր, շոկոլադ և այլ քաղցրավենիք, ինչի պատճառով արագ ավելորդ քաշ էր հավաքում։ Գիբսոնը հիշում է, որ շուտով դրա պատճառով իրեն սկսել են ծաղրել դպրոցում։ Գիբսոնի համար դժվար է դարձել նաև դպրոցական հագուստ ընտրելը. նրան համապատասխան չափսերը եղել են միայն plus size կանանց խանութներում, ինչի համար նրան նույնպես ծաղրել են հասակակիցները:

Երբ նա մեծացավ և պատրաստվում էր հարսանիքին, հարսանյաց սրահներում չկարողացավ գտնել ոչ մի չափի համապատասխան զգեստ։ Այն ստիպված էր կարել պատվերով։ «Ես փորձում էի խաբել ինքս ինձ և հավատալ, որ հիմա երջանիկ եմ։ Ի վերջո, ես ամուսնացած եմ և ունեմ մի մարդ, ով սիրում է ինձ: Եվ ես սկսեցի ավելի շատ ուտել, հատկապես, երբ ամուսինս աշխատում էր գիշերային հերթափոխով, իսկ ես տանը մենակ էի մնում», - հիշում է կինը։

Ամեն ինչ փոխվեց այն բանից հետո, երբ Գիբսոնը հանկարծակի հայտնվեց հիվանդանոցում՝ ձվարանների քաղցկեղի կասկածով: Հետազոտությունից հետո բժիշկները նրա մոտ հսկայական կիստա են հայտնաբերել։ Կինը սարսափել է, երբ իմացել է, որ ավելորդ քաշի պատճառով բժիշկները չեն կարողանա հեռացնել այն։ «Ես դա շատ լավ եմ հիշում։ Եկավ վիրաբույժը, նայեց ինձ և անմիջապես ասաց, որ չի կարող ինձ վիրահատել, քանի որ պաթոլոգիական գիրություն ունեմ և վիրահատական սեղանին չեմ տեղավորվի», — պատմում է նա։

Երբ Գիբսոնը վերադարձավ տուն, հասկացավ, որ պատրաստ է փոխել իր կյանքը և ազատվել ավելորդ քաշից։ Նա դիմել է նիհարելու հարցերով զբաղվող կազմակերպությանը և սկսել աշխատել մասնագետների հետ։ Կինը դադարել է սնվել վնասակար սննդով, իսկ դրա փոխարեն սկսել է տանը համեղ ու հագեցնող ուտեստներ պատրաստել։ Գիբսոնի մոտ կորել է սնվելու ցանկությունը, իսկ նրա քաշը սկսել է արագ նվազել։ Դիետայի փոփոխությունների շնորհիվ նրան հաջողվել է 57 կիլոգրամով նիհարել։

Այժմ նա աշխատում է քաշի կորստի հարցերով զբաղվող կազմակերպությունում և օգնում այլ մարդկանց ազատվել ավելորդ կիլոգրամներից:

Աղբյուր` Փաստինֆո