Փաստ ինֆո

Փաշինյանը փորձում է ստեղծել մի պատկեր, որ «ցարը» լավն է, իսկ «իշխանները» վատն են, դրա համար էլ ժողովրդի վիճակը վատ է։ Այս մասին «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով Նիկոլ Փաշինյանի մարզային այցերին, որոնց հաջորդում են մարզպետների պաշտոնանկությունները։

Բադալյանի դիտարկմամբ` ՀՀ-ում 2018-ից հետո ձևավորվող անձնիշխան կառավարման համակարգն ունի իր գործունեության օրինաչափությունները։

«Սա է պատճառը, որ հիմա «ցարը» անընդհատ գնում է տեղերում ժողովրդի հետ միասին վատ «իշխաններին» պատժելու, թեև հասկանալի է, որ մարզպետը պատասխանատու չէ դպրոցի շինարարական թերությունների համար, դրա համար կան պատասխանատուներ տեղային՝ ստորին օղակներում, նրանք են ստորագրում այդ օբյեկտն ընդունելու ակտերը՝ դրանով իրենց վրա վերցնում պատասխանատվությունը։ Մարզպետը դրա մասին տեղյակ է լինում, բայց մարզպետը պարտավոր չէ գնալ դպրոց ու պատից կախած կախիչները ստուգել, պարզել դրանք պոկվում են, թե ոչ։ Չի կարող մարզպետը դա անել, դա աբսուրդ է , բայց քանի որ հասարակության մեջ կա դժգհություն իշխանություններից՝ բնականաբար, դա պետք է ուղղորդվի կոնկրետ հասցեով։ Այս դեպքում կոնկրետ հասցեն քաղշինկոմիտեի ղեկավարն է և մարզպետները, որոնք տեսանելի են ժողովրդի համար։
Եթե ասեին, որ մեղավոր է շինարարությունն ընդունած ինչ -որ տեխնիակական ծառայության աշխատակից՝ ոչ մեկ նրանց չէր ճանաչելու, իսկ այս դեպում՝ հեռացվում են քիչ թե շատ ճանաչելի պաշտոնյաներ, թեև որևէ մարզպետ չի կարող կախիչների ամրություն ու ցնցուղի արժեք ստուգել։

Եթե մարզպետը բոլոր գյուղերում դպրոցների կախիչներն ու խողովակի անսարքությունը ստուգի՝ նշանակում է, բոլորը պետք է թոշակի գնան ու մարզպետը օրը 24 ժամ քաղաքներում ու գյուղերում շրջի», - ասաց քաղտեխնոլոգը:

Նրա խոսքերով` իրականում հիմա շոու է պետք ցուցադրել։ «Սա բնորոշ է ավտորիտար կառավարման համակարգին, նույնը կատարվում է նաև Բելառուսում, որտեղ նախագահ Լուկաշենկոն գնում է օբյեկտներ ու նույնպես ձեռքով ստուգում է՝ որտեղ փոշի կա, որտեղ չկա, որտե՞ղ է մեխը մինչև վերջ խփած, որտեղ՝ ոչ»։

Քաղտեխնոլոգի դիտարկմամբ՝ այս գործելաոճը ազդեցություն կունենա միայն վարչապետին աջակից ընտրազանգվածի մոտ, իսկ վարչապետին չաջակցող ընտրազանգվածի մոտ դա ծիծաղ է առաջացնելու կամ արհամարհանք։
«Պարզապես պետք է միջին օղակի չինովնիկը վատ ներկայացվի, ու նրա վրա «ջարդվի» ամեն բան։ Սա հասկացել է նաև Լոռու մարզպետը, ով անցած օրերին գրառումներում կամ հացազրույցներում ասում է, որ ինքը միշտ հաշվետվողական է եղել: Նա էլ է հասկանում ու փորձում է բացատրել, որ սա շոու է։ Նման իրավիճակը կարող է տևել մեկ ամիս։

Հիմա մարզպետները, որոնք գիտեն թե վարչապետն ուր է գնալու, ստուգելու են այդ բոլոր օբյեկտների լամպերը , դռան բռնակները, իսկ մնացած տեղերում ոչինչ էլ չեն անելու։ Մեկ ամիս հետո ամեն բան կվերադառնա նույն իրավիճակին, որովհետև համակարգը իրականում ժողովրդավար չէ, ժողովուրդը չի վերահսկում այդ ամենը, այլ ինչ-որ չինովնիկներ, այն էլ` վարչապետին դուր գալու համար միայն», - արձանագրել է Արմեն Բադալյանը:

Աղբյուր` Փաստինֆո