Փաստ ինֆո

Մերձավոր Արևելքը, հավատարիմ մնալով իր բնույթին, շարունակում է մնալ թեժ և այն տեսակետը, որ Մերձավոր Արևելքում պատերազմները չեն ավարտվում, այլ լինում են երկար կամ կարճ զինադադարներ, շատ հստակ է։ Այստեղ տևական խաղաղություն չի լինում։ «ՓաստԻնֆոյի» եթերում ասել է թյուրքագետ, պ․գ․ դոկտոր, պրոֆեսոր Ռուբեն Մելքոնյանը` նշելով, որ արդեն հստակ են լարվածության կողմերը, լարվածության աստիճանը հասել է մաքսիմալի, տեսական հենքը կա, մնում է գործնական քայլերը, ինչի օրինակները տեսնում ենք։

Բանախոսի դիտարկմամբ, կարող ենք ասել, որ սա անցած տարի սկսված Իսրայելի և Պաղեստինի պատերազմի բուն փուլից բացի՝ ենթափուլեր են տեղի ունենում՝ և՛ Իրանի պայթյունները, և՛ Իսրայելի ու Թուրքիայի լարվածությունը։ Այս ամենը թույլ է տալիս ենթադրել, որ տարածաշրջանը գնում է ոչ թե խաղաղության, այլ կոնֆլիկտների ավելի թեժացման և աշխարհագրության ընդլայնման։ Խաղաղությունը բավականին երկար ժամանակով հեռանում է։

Թյուրքագետը նշում է, որ Արևելքը այնպիսի տարածաշրջան է, ուր արտատարածաշրջանային ուժերը մշտական հետաքրքրություններ և ներկայություն են ունեցել։ Ակնհայտ է, որ կան նպատակներ ու ամբիցիաներ, որոնք չեն բավարարվել և շարունակվելու են դրանց ուղղությամբ քայլեր արվել։ Այս կոնտեքստում ամենօրյա ռեժիմով տեսնում ենք, որ շարունակվում են ոտնահարվել այն սկզբունքներն, որի, իբրև թե ջատագովներն են արևմտյան երկրները, ԱՄՆ-ն․ մարդու իրավունքներ, չթույլատրված զենքերի չկիրառում և այլն։ «Աշխարհը մոտավորապես նույն հունով, լուռ անտարբերությամբ և կեղծ լոզունգների ներքո շարունակում է իր ընթացքը, որը ես բնութագրում եմ որպես Երրորդ համաշխարհային պատերազմ։ Ըստ էության, պատերազմ է և պատերազմող բևեռներն էլ հստակ են, ուստի սա կարելի է անվանել Երրորդ համաշխարհային պատերազմ, ուղղակի 21-րդ դարի լույսի ներքո»,- ասել է Ռ․ Մելքոնյանը։

Անդրադառնալով տարածաշրջանում Թուրքիայի դերակատարությանը, բանախոսը նշեց, որ Թուրքիան տարածաշրջանում և աշխարհում հասել է իր ազդեցության բարձրակետին։ Փաստ է, որ Թուրքիայի հետ, ուզեն թե չուզեն, հաշվի են նստում այլ խաղացողներ։ Թուրքիայի և Ռուսաստանի հարաբերություններն էլ ավելի համագործակցային մրցակցություն է։

Անդրադառնալով հայ-ադրբեջանական հարաբերություններին, բանախոսը նշեց, որ Ադրբեջանը դասական ճնշման քաղաքականություն է իրականացնում։ Շարունակվում է Ադրբեջանի հակահայկական քաղաքականությունը, ուղղակի դիվանագիտական ճակատում։
Մանրամասները՝ տեսանյութում։

Աղբյուր` Փաստինֆո