Փաստ ինֆո

Խնդրում եմ Հայաստանի և Ադրբեջանի միջև բանակցվող փաստաթուղթը չանվանել «խաղաղության պայմանագիր», քանի որ այն խաղաղության հետ որևէ առնչություն չունի։ Դա Ադրբեջանի պայմաններով, Ադրբեջանի ուժի սպառնալիքի տակ ինչ-որ փաստաթղթի նախագիծ է։ Այս մասին լրագրողների հետ զրույցում ասել է ԱԺ «Հայաստան» խմբակցության պատգամավոր, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանն՝ անդրադառնալով «խաղաղության պայմանագիր» կնքելու Ադրբեջանի շտապողականությանը։

«Դրանից Հայաստանը որևէ բան ձեռք չի բերում։ Փոխարենն Ադրբեջանը մինչ այս ագրեսիայի հետևանքով ձեռք բերածն ամրագրում է և պատրաստում է նոր հարձակումներ Հայաստանի նկատմամբ։ Մենք ծանոթ ենք այդ փաստաթղթին, այն Հայաստանի համար նոր կապիտուլյացիայի փաստաթուղթ է։

Հայաստանի համար այդ թղթում որևէ դրական կետ չկա, սա մեր ժողովրդին հերթական անգամ մոլորեցնելու սպառնալիքի ուժի տակ նոր կապիտուլիացիոն փաստաթուղթ պարտադրելու քայլ է» ։

Ըստ նրա՝ այն պայմաններում, երբ ադրբեջանական զորքերը շարունակում են մնալ ՀՀ տարածքում, երբ Արցախի ռազմաքաղաքական ղեկավարությունը շարունակում է մնալ Բաքվի բանտում՝ խաղաղության մասին չի կարելի խոսել։

«Հիմա դա խաղաղության մասի՞ն է, թե ոչ։ Սահմանազատում և սահմանագծում իրականում տեղի չի ունենալու, դա մնալու է հետագայում լուծելու խնդիր։ Այդ փաստաթղթով Հայաստանին ոչ մի դրական բան չի տրվելու, միայն արձանագրվելու է Ադրբեջանի ձեռք բերածը»։
Հարցին, թե որն է այս իրավիճակում ելքը՝ նա պատասխանեց, որ Հայաստանի իշխանության ղեկին հայտնվածները ի վիճակի չեն առաջ մղել Հայաստանի շահն ու որևէ դրական բան անել Հայաստանի համար։ « Սրանք ի վիճակի չեն և չեն էլ ուզում, սրանք թուրք-ադրբեջանական տանդեմի խամաճիկ կառավարություն են և վաղուց հեռացել են Հայաստանի տարածքային ամբողջականությունն ու ինքնիշխանությունը պաշտպանելու մտքից։ Սրանք քաղաքական մի գիծ ունեն՝ տանք՝ ինչը հնարավոր է՝ փոխարենը ոչինչ չստանալով։

Կոնկրետ բան եմ ասում՝ 29 800 այդ փաստաթղթի մեջ չկա։ հետևաբար անհիմն են խոսակցությունները, թե տանք Արցախը, որ 29 800 -ը պահենք։

Ինչ վերաբերում է միջանցքին՝ հստակ է նաև Հաջիևի վերջին հայտարարությունից, որ Ադրբեջանը կրկին վերադարձել է միջանցքային խոսակցությանը, և այստեղ շատ կարևոր ենք համարում Իրանի շատ հստակ ու սկզբունքային կեցվածքը, որն արտահայտել են։ Հավատացած ենք, որ այդ հայտարարությունների տակ կա նաև հստակ աշխատանք, և Իրանը, իրականում, որպես բարեկամ և դաշնակից երկիր, շահագրգռված է Հայաստանի տարածքային ամբողջականության պահպանմամբ»,- ասել է Սաղաթելյանը։

Աղբյուր` Փաստինֆո