Փաստ ինֆո

Քերմանում տեղի ունեցած ահաբեկչության կապակցությամբ Հայաստանում Իրանի Իսլամական Հանրապետության դեսպանությունում հունվարի 5-ին բացվեց սգո մատյան։ «Արմենպրես»-ի հաղորդմամբ՝ վաղ առավոտից դեսպանություն են այցելել տարբեր պաշտոնյաներ, ՀՀ-ում հավատարմագրված դիվանագիտական կորպուսի ներկայացուցիչներ, քաղաքական գործիչներ, հասարակական կազմակերպությունների անդամներ, քաղաքացիներ՝ իրենց ցավակցությունը հայտնելու Իրանի ժողովրդին:

Արտաքին գործերի նախարարի տեղակալ Վահան Կոստանյանի ընդգծեց՝ նման դեպքերը ցույց են տալիս, որ ահաբեկչության դեմ պայքարը որևէ վայրկյան չպետք է դադարի, և պետությունները պետք է շարունակեն միասնական ճակատով պայքարել դրա դեմ, որովհետև դա համամարդկային չարիք է։

«Հայաստանի Հանրապետության իշխանությունը՝ թե՛ նախագահը, թե՛ վարչապետը և թե՛ արտաքին գործերի նախարարն իրենց գործընկերներին փոխանցել են ցավակցական հեռագրեր՝ Քերմանում տեղի ունեցած ահաբեկչության հետ կապված։ Եվ ևս մեկ անգամ ուզում եմ վերահաստատել, որ ցանկացած ահաբեկչական գործողություն, որի հետևանքով անմեղ մարդիկ են զոհվում և վիրավորվում, անընդունելի է Հայաստանի Հանրապետության համար»,- ասաց Կոստանյանը։

Իրանի ժողովրդին և այս ողբերգությունից տուժած ընտանիքներին Հայաստանի կառավարության խորին կարեկցանքը փոխանցեց նաև Էկոնոմիկայի նախարար Վահան Քերոբյանը։

«Կարևորելով երկու ժողովուրդների միջև ընդհանուր արժեքներն ու փոխըմբռնումն՝ ընդգծել եմ Հայաստանի դիրքորոշումն ահաբեկչության դեմ`իր բոլոր ձևերով։

Իրանի Իսլամական Հանրապետության դեսպանը և ներկայացուցիչները ողջունել են այս համերաշխության ժեստը։ Երկխոսության ընթացքում ընդգծվեց միջազգային համագործակցության կարևորությունը ահաբեկչության դեմ պայքարում և տարածաշրջանային անվտանգության պահպանման գործում:

Հանդիպման ընթացքում վերահաստատվեց երկկողմ հանձնառությունը` հարաբերությունների ամրապնդման և տարածաշրջանում խաղաղության և կայունության ուղղությամբ համատեղ աշխատանքի համար: Իմ այս այցը Իրանի դեսպանատուն կարևոր քայլ էր՝ դրսևորելու Հայաստանի աջակցությունն Իրանին դժվարին ժամանակահատվածում՝ ամրապնդելով երկու երկրների միջև հարատև բարեկամությունը»- ասաց Քերոբյանը։

ՀՀ-ում Իրանի Իսլամական Հանրապետության արտակարգ և լիազոր դեսպան Մեհդի Սոբհանին շնորհակալություն հայտնեց հայ ժողովրդին, հայ պաշտոնյաներին և Իրանին և Իրանի ժողովրդի բարեկամներին ցավակցական խոսք և զորակցություն հղելու համար։

«Այն, որ նման դժվարին պահերին իրար կողքին ենք, մեր խորը բարեկամական և պատմական հարաբերությունների մասին է վկայում։ Կեցցե՛Հայաստանը։ Կեցցե՛ Հայաստանի ժողովուրդը։ Կեցցե՛ Իրանը։ Կեցցե՛ Իրանի ժողովուրդը»,- ընդգծեց Հայաստանում Իրանի դեսպանը։

Դեսպանի խոսքով՝ այդ ահաբեկչությունը ցույց է տալիս, որ Իրանի թշնամիները վախենում են գեներալ-լեյտենանտ Ղասեմ Սոլեյմանիի համակիրներից և նրան նվիրված միջոցառումներից։

Դեսպանն ընդգծեց, որ  ավելի վճռական են պայքարելու ահաբեկչության դեմ։

Աղբյուր` Փաստինֆո