Փաստ ինֆո

Wildberries-ի աշխատանքից դժգոհությունները շատանում են։ «Փաստինֆո»-ին ահազանգած քաղաքացիներից մեկը պատմեց, որ արդեն գրեթե մեկ ամիս է, ինչ անարդյունք փորձում է հետ վերադարձնել անորակ ապրաքը։

Կինը պատմեց, որ մեկ ամիս առաջ երեխայի համար երկարաճիտ կոշիկներ է պատվիրել, երբ ապրանքը հասել է՝ գնացել է բաշխման կետից վերցնելու, սակայն այդ օրն իրեն սպասարկել չեն կարողացել, քանի որ գրասենյակը հոսանքազրկված է եղել։

«Հաջորդ օրն առավոտյան նորից գնացի, արագ վերցրել եմ ապրանքը, ուղարկել տուն ու գնացել աշխատանքի։ Հետո, երբ արդեն, երբ տանը նայեցի, պարզվեց, դրանք խնդիր ունեն, բացի այդ՝ նաև 2 չափ մեծ էին։ Տարա նույն բաշխման կետ, ասացի, որ և մեծ են, և խնդիր ունեն, սակայն հետ չընդունեցին, ասացին նամակ գրեք, որ հետ վերադարձնենք»։

Արդեն ուղիղ մեկ ամիս է, ինչ հաճախորդն ամեն օր նամակ է գրում Wildberries-ին, սկզբում պատասխանել են, թե հարգում են կարծիքը, կկազմակերպեն հետ վերադարձը։ «Հասցե խնդրեցին, որ կատարեն հետ վերադարձի գործարքը։ Ես նշեցի հասցեն, որից հետո գնացի այն կետը, որի հասցեն նշել էի, բայց ապրանքը հետ վերադարձնել այդպես էլ չստացվեց։ Դրանից հետո պարբերաբար նամակ եմ գրում, որ բերել եմ ապրանքը հանձնման կետ, սակայն հետ վերադարձը չի կատարվել»։ Ավելին՝ հահախորդի նամակները մնում են անպատասխան։

«Ընդ որում ՝ իրենք տեսնում են նամակն ու չեն պատասխանում։ Ես արդեն մոտ 200 000 դրամի առևտուր եմ կատարել այս կայքից, բայց այլևս չեմ պատրաստվում օգտվել իրենց ծառայություններից։ Օր օրի ավելի վատ են աշխատում, այն դեպքում, երբ մրցակցությունն ամեն օր ավելի է թեժանում, քանի որ հիմա օնլայն առևտրով զբաղվողները շատ են։ Այս մոտեցմամբ իրենք երկար չեն կարողանա մրցակցությանը դիմանալ։ 1-2 անգամ, եթե հաճախորդը նման վերաբերմունքի արժանանա՝ այլևս երբեք այդ ծառայությունից չի օգտվի»։

Աղբյուր` Փաստինֆո