Փաստ ինֆո

Արցախից բռնի տեղահանված և Գորիսում բնակություն հաստատած ընտանիքն ահազանգում է՝ տան վարձը չեն կարողանում վճարել, պետության կողմից աջակցությունն էլ՝ միայն մեկ անգամ է ստացել։ Մարտակերտից տեղահանված Շիրինյան Մարինեն ամուսնալուծված է, խնամքին հաշմանդամություն ունեցող մայրն է և երեխան, ահազանգում է՝ երեխայի համար նախատեսված աջակցությունը չեն կարողանում ստանալ,քանի որ համակարգը երեխային «չի ճանաչում»։

«Գորիսից գնացինք Աբովյան (քանի որ Գորիսում առկա չէ այն բանկը, որի քարտից օգտվում է Մարինեն), ստացել ենք 100,000-ը, առաջին ամիսը՝ 50,000-ը, բայց երեխայինը չի ստացվել։ Գորիս եմ դիմել, ասել են՝ քաղաքապետարան գնա, քաղաքապետարան եմ գնում, ասում են՝ սոցապ գնա, սոցապ եմ գնում, ասում են՝ գնա Երևան։ Եկել ենք Երևան, ստացված գումարը միայն տաքսիին է տրվել, դատարկ վերադարձել Գորիս։ Երեխունը չի դառնում։ Ասում են՝ սոցիալական քարտի և պետական քարտի կոդերը չեն համապատասխանում, մեկը՝ ԱԲ է, մյուսը՝ ԲԱ է։ Ասում են՝ երեխան «գոյության մեջ չէ», համակարգիչը չի ընդունում, բայց Արցախում մենք արդեն ութ տարի է, ինչ դրանից էինք օգտվում։ Ոչ մի տեղ չեն կարողանում սարքել, տեղից տեղ են ուղարկում, ոչինչ չեն անում, չեն ասում, որ ես իմանամ ինչ անեմ, ոչ կարողանում եմ վարձ տալ, ոչ եկամուտ ունեմ, մայրս էլ թոշակ չի ստանում, որ կարողանամ վարձը տալ և սնվել։ Երեխայի գումարը չեմ կարողանում ստանալ, իմն էլ՝ մեկ անգամ եմ ստացել»,- «Փաստինֆո»-ի հետ զրույցում ահազանգեց Մարինեն։

Աղբյուր` Փաստինֆո