Փաստ ինֆո

Արցախի «Մունք» տեխնոդպրոցը վերաբացվել է Հայաստանում։ Բռնի տեղահանությունից հետո թիմը գրեթե ամբողջությամբ հաստատվել է Տաշիր քաղաքում։

«Մեր անձնական իրերի փոխարեն՝ ամեն մեկս մեզ հետ տեխնոդպրոցի ինչ-որ գույք ենք բերել։ Ինչ էլ չենք կարողացել բերել, բարերարների նվիրատվության շնորհիվ արդեն ունենք»,-«Փաստինֆո»-ի հետ զրույցում ասում է «Մունք» տեխնոդպրոցի հիմնադիր տնօրեն Աշոտ Ավանեսյանը։

Տաշիրին հարակից հինգ գյուղերում տեխնոդպրոցն արդեն շարժական լաբորատորիաներ է բացել։ Խնդիրը, որը լուծում էին Արցախում, հիմա Հայաստանում են շարունակելու։

«Մեր նպատակները չեն փոխվել։ Այստեղ՝ Հայաստանում նույնպես ամեն ինչ անելու ենք, որ երիտասարդները դուրս չգան գյուղերից․ ապրեն ու աշխատեն իրենց ծննդավայրում։ Հայաստանի սահմանամերձ գյուղերում շատ ավելի տխուր վիճակ է, քան Արցախի գյուղերում էր․ հնարավորությունները շատ քիչ են, ուստի առաջնահերթ ապրելու և աշխատելու հնարավորություններ ստեղծել է պետք»,-ասում է Աշոտը։

Տաշիրում վերաբացվելուց հետո, տեխնոդպրոցն արագ տեմպով սկսել է ընդլայնվել․ Վանաձորում  նույնպես արդեն կենտրոն ունեն։ Հաջորդիվ Կապանում է նախատեսվում գործունեություն ծավալել։ Այդ նպատակով դրամահավաք է ընթանում ներկա պահին։ Աշոտի խոսքով՝ անհրաժեշտ գումարի մեծ մասը հավաքվել է։

«Կապանում նախ շարժական լաբորատորիա կբացենք։ Դա առաջին օղակն է, որտեղ բազային գիտելիքներ, որոշակի հմտություններ են ձեռք բերում շահառուները։ Երբ որ այդ էտապն անցնենք, արդեն դպրոցը կբացենք։ Արցախում նույնպես այդպես ենք արել։ Ցավոք, երրրորդ փուլին՝ պրակտիկային, չենք հասցրել հասնել այնտեղ։ Մի քանի շրջանավարտ ունենք, որ բոլոր երեք փուլերն ավարտել են Արցախում։ Այս իսկ պատճառով բոլոր մեր ուսանողները, որոնք այնտեղ չեն կարողացել ինկուբացիոն շրջանն անցնել, Հայաստանի մեր գործընկերների մոտ են անցնելու»,-բացատրում է Աշոտը։

«Մունք»-ի թիմը բավականին հեռահար նպատակներ ունի։ Աշոտն ասում է՝ պետք է հասնեն ՀՀ բոլոր մարզերը․ 2024թ․ նախատեսում են Վարդենիսում առաջնահերթ բացվել։

«Եթե այսպես մտածեինք ու սկսեինք աշխատել 10-15 տարի առաջ ու դա արվեր բոլոր ոլորտներում, ապա Արցախում ու Հայաստանում բոլորովին այլ իրավիճակ կլիներ։ Նախաձեռնող, պրպտող, անդադար ինքնակրթվող, ցանկացած խնդրի լուծումը գտնող մարդիկ են, որ հավաքված են այստեղ։ Բոլոր մարզերում ու, կրկնում եմ, բոլոր ոլորտներում պետք է ունենանք նման երիտասարդներ»,-ասում է Աշոտը։

Աղբյուր` Փաստինֆո