Փաստ ինֆո

Հայաստանի իշխանությունների հետ հանդիպումների ընթացքում միջազգային բանկային տարբեր դոնոր կազմակերպություններ մեծ հետաքրքրություն են ցուցաբերում «Խաղաղության խաչմերուկ» ծրագրի նկատմամբ: Այս մասին այսօր ամփոփիչ ասուլիսում ասաց ՀՀ տարածքային կառավարման և ենթակառուցվածքների նախարար Գնել Սանոսյանը:

«Մեզ հետ քննարկումների ընթացքում միջազգային մի շարք գործընկերներ մեծ հրատաքրքրություն են ցուցաբերում ծրագրի նկատմամբ, փորձում են նախանշել, որ իրենց հետաքրքրությունը, և, եթե այդ գործընթացքում շինարարություն կամ այլ գործընթաց իրականացնելու կարիք կա, ապա իրենք ուրախ կլինեն ներգրավվել այդ գործընթացներում: Այնպես որ ազդակները բավական դրական են»։
Անդրադառնալով 8 գյուղերի նկատմամբ ադրբեջանցիների պահանջի մասին, որոնց առնչությամբ Ադրբեջանի արտգործնախարարը խոսել է նաեւ նախօրեին՝ Սանոսյանն ասաց, որ կան որոշ տարածքներ որոնց մասին Ադրբեջանն է նախանշում և կան տարածքներ, որոնց մասին մենք ենք խոսում։

«Հիմա գործընթացը կարող է կազմակերպվել հետևյալ կերպ, որ այդ տարածքները նախանշվեն, դրանց իրավաբանական հիմքերը պետք է հանել, այնուհետև տեղի կունենա երկու գործընթաց՝ մեկը փոխանակումն է, մյուսը ֆիզիկապես թողնել, զուտ տարածական որոշակի կարգավորումներ ունենալ: Կարգավորում նկատի ունեմ այն, որ այդ տարածքները որոշակի մակերես ունեն, և դելիմիտացիա, դեմարկացիա կոչվող երևույթը կարող է այս հարցի պատասխանը տալ: Իմ պատկերացմամբ՝ այս հարցին կարելի է պատասխանել հենց այդ աշխատանքային խմբի շրջանակներում, երբ սահմանների դեմարկացիա, դելիմիտացիա տեղի ունենա»,-ասաց Սանոսյանը:

Աղբյուր` Փաստինֆո