Փաստ ինֆո

20-ամյա Արթուր Ավանեսյանը սեպտեմբերի 19-ին՝ Արցախի դեմ Ադրբեջանի սանձազերծած լայնամաշտաբ պատերազմի ժամանակ ծանր վիրավորվել է։ Նա Մարտունու շրջանի Ավդուռ գյուղից է։ Ադրբեջանական ահաբեկչական ստորաբաժանումների հարձակման ժամանակ, լինելով աշխարհազորում ընդգրկված, զենքն ստացել ու անմիջապես զբաղեցրել է դիրքը։ Մարտից, որը վարել են 10 հոգով՝ ադրբեջանական անհաշիվ ահաբեկիչների նկատմամբ, Արթուրը շատ բան չի հիշում․ ստացած ծանր վնասվածքների հետևանքով շուրջ մեկ ամիս կոմայի մեջ էր։

«Մենակ հիշում է այն, որ հենց իմացել է ադրբեջանցիների հարձակման մասին, ПК-ն վերցրել ու բարձրացել է դիրք՝ մտածելով, որ եկել է վրեժ լուծելու պահ․․․»,-«Փաստինֆո»-ին պատմում է Արթուրի քույրը՝ Անուշը։

Ավանեսյանների ավագ եղբայրը՝ Արմանը, 44-օրյա պատերազմի ժամանակ է զոհվել։ Երկուսով 16-17 տարեկանից աշխարհազորի կազմում են եղել։

Արթուրն ու կրստեր եղբայրը՝ Արայիկը, որպես զոհվածի եղբայրներ, ժամկետից շուտ են զորացրվել։ Անուշը հիշում է՝ երբ հորդորում էին դուրս գալ աշխարհազորից՝ ասում էր․ «Որ պատերազմ լինի, ի՞նչ ենք անելու, մահճակալի տա՞կ ենք մտնելու․․․»։

Որ ամեն ինչ այսպես կվերջանար, Արթուրի մտքով չի անցել։ Նման ավարտ չի պատկերացրել նաև մայրը։ Անուշը պատմում է՝ մայրն անգամ մի նկար չի վերցրել զոհված եղբորից, քանի որ սեպտեմբերի 19-ի գիշերը որ տարհանվել են, մտածել է, թե մի քանի ժամից նորից հետ են գնալու գյուղ։

Արթուրն ու Արայիկը նույն դիրքում են եղել սեպտեմբերի 19-ին։ Արայիկը, որ տեսել է եղբայրը վիրավորվել է՝ անմիջապես վրա է հասել․․․

Դիրքի ևս մեկ տղայի հետ Արթուրին հանել են։

Քանի որ ստացած վնասվածքները բավականին ծանր են եղել, Արթուրին հոսպիտալացրել են Էրեբունի ԲԿ-ում։ Վիրահատությունների թիվը քույրն էլ է արդեն մոռացել։ Առնվազն մեկն էլ մեկուկես ամսից պետք է արվի։

Բացի գանգուղեղային, կրծքավանդակի վնասվածքներից, նաև ամպուտացվել է Արթուրի մի ոտքը, մյուսի շարժունակությունն էլ հազիվ 25-30 տոկոս է։ Ավդուռի ինքնապաշտպանությանը մասնակցած երիտասարդի ընտանիքը հիմա անելանելի վիճակում է գտնվում։

Հիվանդանոցին մոտ լինելու համար ստիպված տուն են վարձակալել Երևանում։ Տան վարձը մի կերպ են տալիս․ ընտանիքի միակ աշխատողը կրստեր եղբայրն է՝ այն էլ ոչ ամեն օր է աշխատանք ունենում։ Մյուս կողմից՝ Արթուրին անհապաղ անվասայլակ է պետք։

«Դիմել եմ Վերակագնողական անհատական ծրագրին, որ անվճար տրամադրեն, բայց այնտեղից էլ տալիս են միայն հաշմանդամության կարգ ունեցողներին։ Արթուրին կարգ տալու համար երկար թղթաբանություն է պահանջվում։ Պատճառաբանական հիմնավորում պետք է տրվի, որի հիման վրա պոլիկլինիկան տեղեկանք տա ու ըստ այդմ՝ հաշվանդամության կարգը որոշվի։ Պարզվում է, որ դրանից բացի նաև ՔԿ-ից է պետք տեղեկանք ստանալ, որ իրոք ռազմական գործողությունների հետևանքով է հայտնվել այդ վիճակում։ Այսօր եմ ՔԿ դիմում ներկայացրել, ու ասել են, որ 20 օրից նոր կտան»,-պատմում է Անուշը։

Արթուրի ընտանիքի ֆինանսական վիճակն էլ, այս ամենին զուգահեռ, ավելի ծանրանում է․․․

Աղբյուր` Փաստինֆո