Փաստ ինֆո

Այս տարվա դեկտեմբերը եղավ անոմալ տաք, օդի ամսական միջին ջերմաստիճանը այս պահի դրությամբ կլիմայական նորմայից բարձր է 5-6 աստիճանով։ Այս մասին այսօր հրավիրված ասուլիսին ասաց ՀՀ շրջակա միջավայրի նախարարության հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանն՝ ընդգծելով, որ մենք ունեցանք նաև կլիմայական ռեկորդներ, այսինքն, դեկտեմբերի 2-րդ տասնօրյակում Արարատյան դաշտում օդի ջերմաստիճանը հասավ մինչև 16 – 17,5 աստիճան տաքության, որը մոտ 3 աստիճանով գերազանցեց դեկտեմբերի 3-րդ տասնօրյակում դիտված երբևէ առավելագույն ջերմաստիճանը։

«Վերջին 100 տարիների ընթացքում այս տարվա դեկտեմբերն ամենատաքն է»։

Անդրադառնալով առաջիկա օրերի կանխատեսումներին՝ նա ընդգծեց, որ մինչև օրս մենք գտնվում ենք կրկին արևադարձային տաք օդային հոսանքների ազդեեցության գոտում։ «Օդի ջերմաստիճանը շարունակում է հանրապետության ողջ տարածքում կլիմակայան նորմայից բարձր մնալ մոտ 6-8 աստիճանով։ Առաջկա 5 օրերին, այդ տաք օդային հոսանքները չեն նախանջելու։ Մինչև հունվարի 5-6-ը ներառյալ մենք գտնվելու ենք տաք հոսանքների ազդեցության գոտում, անոմալ բարձր ջերմային ֆոնը պահպանվելու է և հանրապետության ողջ տարածքում հաստատվելու է առանց տեղումների եղանակ։

Առաջիկա 5 օրերը կրկին կանցնեն բարձր ջերմային ֆոնով և առանց տեղումների։ Ուժեղ քամիներ, գետնաբուք առաջիկա օրերին հանրապետության տարածքում չենք սպասում»։
Անդրադառնալով հունվար ամսվա կանխատեսումներին՝ նա ընդգծեց, որ հունվարին կրկին օդի միջին ջերմաստիճանը հանրապետության ողջ տարածքում կանխատեսվում է կլիմայական նորմայից բարձր՝ 3-5 աստիճանով։

«Տեղումների քանակը նորմային մոտ, ինչը նշանակում է, որ մենք ունենալու ենք նորից անոմալ տաք և բավարար տեղումներով հունվար։ Առանձին օրերին, հանրապետության լեռնային մարզերում, Շիրակում, Կոտայքի լեռնային գոտիներում, Արագածոտնի լեռնային գոտիներում, Վայոց Ձորի լեռնային գոտիներում Գեղարքունիքում օդի ջերմաստիճանը ցերեկային ժամերին կբարձրանա մինչև +5 - +9 աստիճանի։

Լոռիում, տավուշում Սյունիքի հովտային գոտիներում առավելագույն ջերմաստիճանը կարող է հասնել +16 - +20 աստիճանի։
Արարատյան Դաշտում և Երևանում մինչև +10 - +14 աստիճանի»։

Աղբյուր` Փաստինֆո