Փաստ ինֆո

Ցավոք, այս վերջին երեք տարիները մեզ համար կորուստների տարի են և մենք անընդհատ խնդիրներ ունենք՝ թե՛ մարդկային զոհեր, թե՛ տեղափոխություններ, թե՛ բռնազավթված տարածքներ, սակայն ժողովրդի պատմության էջերում մշտապես ունեցել ենք թե՛ վերելքների, թե՛ վայրէջքների ժամանակաշրջաններ։ Սա ժողովրդի զարգացման, կայացման բնականոն ընթացք է, որպեսզի հասարակությունը, ազգը կարողանա կայանալ, իր ուրույն տեղը ունենալ՝ անցնելու է այդ ճանապարհներով։ Մանավանդ քրիստոնյա հասարակության համար չպետք է ակնկալենք, որ հարթ ճանապարհ ենք ունենալու։ «ՓաստԻնֆոյի» եթերում ասել է Նուբարաշենի սրբոց նահատակաց եկեղեցու հոգևոր հովիվ տեր Բարդուղիմեոս քահանա Հակոբյանը։

Բանախոսի դիտարկմամբ, հիմա մեր ազգի մոտ մի ժամանակաշրջան է, երբ հոգևոր, արժեհամակարգային անկում ենք ունեցել և հասել այսպիսի իրավիճակի։ Մենք պետք է կարողանանք մեր մեջ ուժ գտնել, վերափոխվել, գտնել մեզ միավորող ուժը, որով կարող ենք համախմբվել և դուրս գալ այս իրավիճակից։ Յուրաքանչյուրս մեր տեղում թերացումներ ունեցել ենք։

Տեր հայրը նշում է, որ հասարակությունը բազմաշերտ է, բայց տարածքի կորուստը յուրաքանչյուր հայորդու համար մեծ ցավ է։ Մենք մեր հայրենիքի մի մասը կորցրեցինք և տևական շրջան է, որ մենք կորուստների առջև ենք կանգնում և չենք կարողանում հաշտվել դրա հետ։ Քրիստոնեությունը սովորեցնում է ինքնապաշտպանություն։

Քրիստոս ասում է. «Ձեր սրբությունները երբեք չթողնեք ոտնակոխ անեն»։ Եթե մեր վրա հարձակվում են, բնականաբար պետք է պաշտպանվենք, քանի որ հարձակմամբ վտանգի տակ են դրվում մեր սրբությունները՝ հայրենիքը, ընտանիքները, սրբավայրերը, հողը, քանի որ այդ հողի համար հազարավոր մարդիկ իրենց կյանքն են զոհաբերել։

«Մահվան սպառնալիքը մշտապես եղել է, կա և երբեք չի բացակայել։ Պետք չէ մահվան նկատմամբ վախի արդյունքում չանել գործողություններ։ Վատ երևույթները միշտ էլ կան մեր կյանքում։ Միշտ լինելու են տարբեր հարցեր, որոնք մարդուն փակուղու առջև են կանգնեցնելու։ Մարդը պետք է իր վերաբերմունքը և այդ հարցի ճիշտ լուծման մեխանիզմը կարողանա գտնել։ Մենք հավատքի ճիշտ արտահայտման խնդիր ունենք։ Փոփոխության համար մարդը պետք է կարողանա ապաշխարել։ Ոչ բոլորն են ապրում քրիստոնյայի կյանքով և շատ ու շատ խնդիրներ նաև սրանից են առաջանում»,- ասել է տեր Բարդուղիմեոս քահանա Հակոբյանը։

Մանրամասները՝ տեսանյութում։

Աղբյուր` Փաստինֆո