Փաստ ինֆո

ԱՄՆ-ից մի կին գանգատվել է գլխացավից և հաջորդ առավոտյան կորցրել է հիշողությունը։ Այս մասին հայտնում է The New York Post-ը։

ԱՄՆ-ից 60-ամյա մի կին լրագրողներին պատմել է, թե ինչպես է մոռացել իր կյանքի վերջին 40 տարիները։ 2018 թվականին Լուիզիանայից Քիմ Դենիկոլան մասնակցել է Աստվածաշնչի ուսումնասիրությանը և հանկարծակի միգրենի ծանր նոպա ունեցել։ Նրա տեսողությունը մշուշվել է, իսկ հետո կորցրել է գիտակցությունը։

Երբ Դենիկոլան շտապ հոսպիտալացումից հետո արթնացել է հիվանդանոցում, նա բուժքրոջն ասել է, որ հիմա 1980 թիվն է։ Նա նաև ասել է, որ ինքը դեռահաս է, որ իր ամենավերջին հիշողությունն այնէ, որ դպրոցական քննությունից հետո քայլումէ  դեպի մեքենան։

Երբ Դենիկոլային հայտնել են, որ նա 56 տարեկան է, նա պարզապես ցնցվել է։ Նա էլ ավելի շատ է տխրել, երբ նրան ասել են, որ իր ծնողներն այլևս ողջ չեն։ Նա չէր հիշում, որ ամուսին ունի, ոչինչ չէր հիշում երեխաների ու թոռների ծննդյան մասին։ Բժիշկները նրա մոտ ախտորոշել են անցողիկ գլոբալ ամնեզիա։ Չնայած բազմաթիվ թեստերին ու անալիզներին՝ բժիշկներին չի հաջողվել պարզել ամնեզիայի պատճառը:

Փորձագետները հույս ունեին, որ որոշ ժամանակ անց Դենիկոլայի հիշողությունը մասամբ կվերականգնվի, բայց նույնիսկ հինգ տարի անց կնոջ հիշողությունները չվերադարձան: Դենիկոլան փորձում է ընտելանալ իր նոր կյանքին՝ կարդալով իր օրագրային գրառումները։ Այնուամենայնիվ, նա ասում է, որ կինը, ում մասին կարդում է օրագրում, իրեն օտար է թվում: Միաժամանակ, մասնագետների կարծիքով, այսքան տարի անց հիշողության վերադարձի հույս գրեթե չկա։

Աղբյուր` Փաստինֆո