Փաստ ինֆո

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, քիչ առաջ հրապարակեց որոշումը՝ դադարեցնելով ՀՀ երկրորդ նախագահ Ռոբերտ Քոչարյանի նկատմամբ քրեական հետապնդումը՝ վաղեմության ժամկետներն անցած լինելու հիմքով։

Դատարանի որոշմամբ՝ վերացվել են նաև Ռոբերտ Քոչարյանի՝ սահմանը հատելու արգելքը, ինչպես նաև՝ գույքի վրա դրված արգելանքը։ Գրավի գումարը վերադարձվել է Քոչարյանին։

Նշենք, որ այս գործով վաղեմության ժամկետներն անցել են դեռևս մայիսին։ Նախկինում Ռոբերտ Քոչարյանն առարկել է իր նկատմամբ քրեական հետապնդումը վաղեմության ժամկետներն անցած լինելու հիմքով դադարեցնելուն՝ պնդելով, որ անմեղ է, այս անգամ, սակայն, Քոչարյանն արդեն չի առարկել այդ հիմքով քրեական հետապնդումը դադարեցնելուն։ Լրագրողների հետ զրույցում Ռոբերտ Քոչարյանի պաշտպան Միհրան Պողոսյանը հիշեցրեց Նիկոլ Փաշինյանի հայտարարությունը՝ կառավարության նիստին, որով վերջինս դժգոհություն էր հայտնել, թե մեղադրական դատավճիռներ չկան, նիստերը չեն կայանում, ինչից հետո դատարանները «հրահանգը ստացել են» և նույնիսկ անիրական պայմաններում նիստեր են նշանակել։ Օրինակ, դատավորն իմացել է, որ գործով նոր ներգրավված պաշտպան Մ․ Պողոսյանը նախապես նշանակված նիստ է ունեցել Գորիսում, սակայն, այդուհանդերձ նշանակել է դատական նիստը, ավելին, Ռ․ Քոչարյանն ունեցել է առողջական խնդիրներ և այդ հարցով պայմանավորված՝ արտերկրում հետազոտություն անցնելու միջնորդության վերաբերյալ որոշում չի կայացվել։

«Դատարանը, նախկինում մի քանի անգամ թույլատրած լինելով նույնական հանգամանքներում Քոչարյանի ելքը՝ մեզ դրեց երկընտրանքի առջև՝ չեք գնում, առողջությամբ չեք զբաղվում, ներկայանում եք դատական նիստերին, որոնք, ըստ էության, չեն կայանալու։ Այսինքն՝ պարոն Քոչարյանի դիրքորոշումն՝ այս գործը ավարտելու, պայմանավորված է բացառապես նրանով, որ հնարավոր չի եղել առողջական խնդիրներով զբաղվելու։ Դատարանը մեզ այլ ելք չի տվել, քան՝ պարտադրված այդ դիրքորոշումը հայտնել և գործի վարույթը կարճել»,- ասաց Պողոսյանը։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո