Փաստ ինֆո

7-րդ դասարանի «Հայոց պատմություն» դասագրքով՝ մեր նախարարությունը զբաղվել է հենց սկզբից և զբաղվել է մինչև այն պահը, երբ հարցերը սկսեցին հնչել հանրային տիրույթում։ Այս մասին այսօր հրավիրված ասուլիսում ասաց ՀՀ ԿԳՄՍ նախարար Ժաննա Անդրեասյանն՝ ընդգծելով, որ հենց սկզբից հասկանալով, որ բոլոր դասագրքերը առաջին անգամ են մուտք գործում դպրոցներ՝ հեղինակներին պայմանավորվածությունն են ունեցել, որ հետագայում նրանք հավաքագրելու են բոլոր խնդիրները, որոնք բարձրացվում են, և մեզ ներկայացնեն մեզ անհրաժեշտ լրամշակումների ծավալը։

Նա նաև հայտնեց, որ երկրորդ կիսամյակից այդ լրամշակումները պետք է արված լինեն։

«Խոսքը բոլոր նոր դասագրքերի մասին է, 30 նոր դասագիրք է մտել դպրոց, բոլոր դասագրքերի մասով այդ աշխատանքն արվել է։
Ինչ վերաբերում է «Հայոց պատմություն» առարկայի 7-րդ դասարանի դասագրքին, քանի որ հանրային հնչողությաւն ստացավ և կային մասնագետներ, որոնք նաև ոչ հանրային դիտարկումներ էին հնչեցրել՝ մենք բոլորի հետ նախարարությունում կազմակերպեցինք հանդիպում և ունենք հետևյալ պայմանավորվածությունը. հիմա սպասում ենք հեղինակների կողմից ամբողջական անդրադարձին։ Այսինքն, լինելու է աղյուսակ, որտեղ լինելու է դասագրքի վերաբերյալ բոլոր դիտարկումները, հեղինակի արձագանքը դրանք, այսինքն՝ ընդունել է, թե չի ընդունել, և հիմնավորումը՝ ինչո՞ւ է ընդունել, կամ ինչո՞ւ չի ընդունել»։

Նա ընդգծեց, որ այդ հիմնավորումները պետք է լինեն փաստարկված և մասնագիտական դաշտում, հեղինակը պետք է հիմնավորի, թե ինչու չի ընդունել, կամ ինչու է ընդունել։ «Այնուհետև, մենք պայմանավորվել ենք, որ այդ ամփոփաթերթը հասանելի կդառնա բոլորին, ովքեր դիտարկումներ են ներկայացրել, որպեսզի իրենք տեսնեն, թե հեղինակն ինչպես է արձագանքել դրանց։ Այնուհետև, նախարարությունը այդ ամբողջական փաստաթուղթը կուղարկի երրորդ՝ անկախ կարծիքի, որպեսզի մենք՝ որպես նախարարություն ունենանք վերջանական եզրակացություն՝ արվելիք փոփոխությունների և դրանց նպատակահարմարության մասին։

Հիմա սպասում ենք հեղինակների կողմից ամփոփված դիտարկումներին և դրանց փորձաքննության։

Հաճախ էմոցիաները խանգարում են, որ մենք տեսնենք աշխատանքային պրոցեսը, իսկ աշխատանքային պրոցեսը մեկն է, կա նոր դասագրքեր, նոր դասագրքերը անցնում են փորձարկում, որի ընթացքում ի հայտ են գալիս փոփոխությունների կարիք, որը նորմալ աշխատանքային պրոցես է, դրա արդյունքում մենք կունենանք նորմալ դասագրքեր»։

Աղբյուր` Փաստինֆո