Փաստ ինֆո

Ինչպե՞ս եղավ, որ իշխանությունները «Կարմիր գծերի» թանկացման որոշումն ընդունեցին ընտրություններից անմիջապես հետո։ Պարզ է, չէ՞՝ ինչու։ Նույն պատճառով, ինչ 2021թ ընտրություններից առաջ չէին խոսում Արցախի հարցում սպասվող ողբերգական զարգացումների մասին։ Խոսում էին՝ Արցախի ինքնորոշման, Հադրութի և Շուշիի դեօկուպացիայի մասին, նույնիսկ իրենց նախընտրական ծրագրում են մտցրել այդ կետերը՝ հրաշալի իմանալով, որ անիրատեսական ծրագիր է։ Այս մասին լրագրողների հետ զրույցում ասաց Երևանի ավագանու «Ազգային առաջընթաց» խմբակցության ղեկավար, նախկին քաղաքապետ Հայկ Մարությանը։

«Ի՞նչ եղավ 2021թ ընտրություններից ընդամենը մի քանի ամիս անց՝ մոռացան ինքնորոշում բառը, այսօր նաև՝ Արցախ բառը։ Նույն պոպուլիզմը, նույն խաբեությունը նաև հիմա է, նորից ժողովրդին խաբում են՝ ընտրություններից առաջ ոչ մի բառ թանկացումների մասին։ Չնայած, իրենց էլ է հասկանալի, եթե ընտրություններից առաջ այդ մասին խոսեին, ապա քաղաքապետ ընտրելու հարցում իրենց անգամ «Հանրային ձայնը» չէր օգնի»,- նշեց Մարությանը՝ արձանագրելով, որ «Հանրային ձայնը» ոչ միայն քաղաքապետ ընտրելու հարցում է օգնում ՔՊ-ին, այլև՝ հետագայում, այդ թվում՝ «Կարմիր գծերի»՝ 160,000 դրամի չարաբաստիկ օրենքի ընտրության հարցում։

«Եթե «Հանրապետություն» կուսակցությունը ՔՊ-ի աջ ձեռքն է, ապա՝ «Հանրային ձայնը»՝ ձախ։ Մնում է հասկանալ՝ ՔՊ-ն աջլիկ է, թե ձախլիկ »,- ասաց Մարությանը։

Աղբյուր` Փաստինֆո