Փաստ ինֆո

Բոլորն ականատես եղան, թե որ քաղաքական ուժը ապահովեց Երևանի ավագանու նիստի քվորումը: Հետագա բոլոր թանկացումների պատասխանատվությունը իշխանությունների հետ հավասարաչափ կիսելու է «Հանրային ձայն» կուսակցությունը: Այս մասին Երևանի քաղաքապետարանի շենքում լրագրողների հետ զրույցում ասաց ավագանու «Մայր Հայաստան» խմբակցության ղեկավար Մանուկ Սուքիասյանը:

«Մենք արձանագրեցինք, որ ընդունվելիք թանկացումները Նոր տարվա դեկտեմբերի 31-ի գիշերը երեւանցիներին մատուցելու են նվեր՝ թանկացումների տեսքով: Քաղաքական ուժերը էլ ավելի են պարզաջրվում:

Բյուջեի եւ թանկացումների վերաբերյալ բոլոր թվաբանական, ելքային և մուտքային հնարավոր սողնացքներից բխող ֆինանսական արտահոսքերի բոլոր դրվագներին, նյուանսներին «Մայր Հայաստանը» կանդրադառնա, բայց ամենակարևորը՝ քաղաքացիները արդեն շատ պարզ հասկացան՝ ով՝ ով է, ով՝ ինչ դիրքորոշում ունի»,-ասաց նա:

Այս հայտարարությունից հետո նիստը բոյկոտող երկու խմբակցությունների անդամները մտան նիստերի դահլիճ։

Հիշեցնենք, որ ավանագու նիստին գրանցվեց ավագանու 36 անդամ՝ «Քաղաքացիական պայմանագիր», «Հանրապետություն» և «Հանրային ձայն», խմբակցություններից։

Այսօրվա նիստի օրակարգում է տեղական տուրքերի և վճարների մասին փոփոխությունների նախագիծը, որով ավտոկայանատեղիների արժեքը մայրաքաղաքի կենտրոնում 12 000 դրամից բարձրանալու է՝ հասնելով 160.000 դրամի:

Աղբյուր` Փաստինֆո