Փաստ ինֆո

2023 թվականի HelpCourt դատավորների վարկանիշավորման գործընթացն ավարտվեց:

«Թափանցիկ ձեռք 2023» մրցանակն ավանդույթի համաձայն հանձնվեց 2023 թվականի արդյունքներով փաստաբանների կողմից ամենաբարձր վարկանիշի արժանացած դատավորին՝ Երևան քաղաքի ընդհանուր իրավասության դատարանի դատավոր ԴԱՎԻԹ ՀՐԱՉՅԱԻ

ՀԱՐՈՒԹՅՈՒՆՅԱՆԸ

Համակարգի հիմնադիր Լևոն Սահակյանը շնորհավորեց պարոն Հարությունյանին և մաղթեց մասնագիտական մեծ հաջողություններ։

Պարոն Հարությունյանն էլ, իր հերթին, նշեց. «Շնորհակալ եմ <<helpcourt>> համակարգին, ի դեմս Լևոն Սահակյանի, կայացած նախաձեռնությունը տարիներ շարունակ հետևողականորեն պաշտպանելու համար։ Գնահատականն ինձ համար մեծ պատիվ է, շհնորհակալ եմ քվեարկությանը մասնակցած բոլոր փաստաբաններին, հատկապես նրանց ում դիրքորոշումների հետ չեմ համաձայնվել դատական ակտեր կայացնելիս: Նման ու ավելի բարձր գնահատականի արժանի են բոլոր գործընկեր դատավորները, ովքեր շարունակում են ոտնձգությունների ու մարտահրավերների պայմաններում առանց անկախության գործնական պատշաճ երաշխիքների ու մեխանիզմների ապահովել իրավունքի գերակայությունը կայացվող ակտերով: Այդուհանդերձ պետք է նշեմ, որ առողջ համակարգում <<հաղթող>> դատավորներ չպետք է լինեն, պետք է հաղթի դատավորների համայնքը, դատական իշխանությունը։ Մասնագիտական հանրության, քաղաքացիների հետ միասին է դա հնարավոր։ Միայն այդ պայմաններում կկարողանանք բոլորով քաղել իրավունքի գերակայության պտուղները:»:

Ի դեպ, յուրաքանչյուր ոք կարող է ամբողջությամբ ծանոթանալ HelpCourt վարկանիշավորման գերթափանցիկ գործընթացի արդյունքներին http://helpcourt.am/  էլ. կայքի միջոցով: Այդ թվում տեսնել, թե ո՞ր փաստաբանը, ո՞ր դատավորին ի՞նչպես և ե՞րբ է գնահատել:
Համակարգը շնորհակալություն է հայտնում վարկանիշավորման գործընթացին մասնակցած բոլոր փաստաբաններին:

Համակարգն իր խորին շնորհակալությունն է հայտնում նաև Գյումրի քաղաքում գործող gHost Services ՍՊԸ-ի ողջ անձնակազմին: Շնորհիվ նրանց համակարգը կրկին ապահովվեց որակյալ ծրագրային աջակցությամբ:

Համակարգն իր շնորհակալությունն է հայտնում նաև STEKO ընկերությանը, որը համակարգին կրկին ապահովեց բարձրաճաշակ և խորհրդանշական «Թափանցիկ ձեռք» հուշանվերով:

Դատավորների 2023 թվականի վարկանիշավորման գործընթացը համարվում է ստացված

Աղբյուր` Փաստինֆո