Փաստ ինֆո

Երևանի կենտրոնում այսպես կոչված՝ «կարմիր գծերի» վարձավճարների բարձրացման նախագծի շուրջ առաջարկություններ ենք ներկայացրել ՔՊ-ին ։ Այս մասին «Փաստինֆոյի» հետ զրույցում ասաց Երևանի ավագանու «Հանրային Ձայն» խմբակցության ղեկավար Վահան Ավագյանը` նշելով, որ դրանց վերաբերյալ ՔՊ-ի դիրքորոշումն էլ հաշվի կառնեն տեղում որոշում կայացնելիս։

Հիշեցնենք, որ դեկտեմբերի 26-ին Երևանի ավագանու նիստում քննարկման կդրվի Երևանի փոքր Կենտրոնում՝ Ա և Բ գոտիներում մեքենաների կայանման համար վարձավճարների թանկացման հարցը։ Քաղաքապետարանն առաջարկում է Փոքր Կենտրոնում այսպես կոչված՝ կարմիր գծերի վարձավճարները տարեկան 12 000 դրամից հասցնել 160 000-ի։

Ավագյանը պարզաբանեց, որ իրենք առաջարկել են անվճար կայանման հնարավորություն էլեկտրոմոբիլների համար, տաքսիների համար առաջարկել են տեղերի քանակի ավելացում, անվճար տեղեր հաշմանդամների համար, ինչպես նաև՝ բոլորի համար անվճար կայանման հնարավորություն կիրակի օրերին։

«Կենտրոնի բնակիչների համար մեքենաներին վրա առաջարկում են պիտակներ ամրացնել, որպեսզի նրանց համար կայանումը անվճար լինի կամ էլ ժամերը 24.00-ի փոխարեն՝ նվազեցնել 21.00-ն։

Ես կարծում եմ, որ ՔՊ-ի հիմնավորումը, թե այս նախագծով նպատակ ունեն խցանումները նվազեցնելու՝ մանիպուլիացիա է, դրա համար նաև առաջարկել ենք, որ մի քանի փողոց լինի շատ թանկ կայանման համար, օրինակ Աբովյան փողոցի կայանման վարձը կարելի է բարձրացնել, Հյուսիսային պողոտայի հարակից փողոցներինը, այդ հատվածներում կարող են լինել բարձր գներ, ինչպես եվրոպական քաղաքներում է, որպեսզի այդտեղ շատ քիչ մեքենաներ կայանեն, իսկ մնացածը կարելի թողնել նույնը»,- նշել է նա։

Դիտարկմանը, թե ավագանու մյուս ընդդիմադիր խմբակցությունները առաջարկում են բոյկոտել նախագիծը՝ Ավագյանն ասաց, որ «կարմիր գծեր» հասկացությունը ներմուծել են այն ֆրակցիաների հիմնադիրները կամ «հայրերը»,որոնց հետևորդները բողոքում են կարմիր գծերից, ու հիմա բողոքում են, թե գները բարձրացնում են։ Նման մանիպուլիացիներին «Հանրային ձայնը» դեմ է»։

Աղբյուր` Փաստինֆո