Փաստ ինֆո

Այսօր ՀՀ-ն ՄԻԵԴ-ից «քարտ բլանշ» ունի` թույլատրվում է ամեն ինչ անել, բայց դա էլ ժամկետ ունի, չէ՞։ Անժամկետ ոչինչ չի լինելու։ Այս մասին «Փաստինֆո»-ի տաղավարում հայտարարել է ԲԴԽ նախագահ Ռուբեն Վարդազարյանը։

ԲԴԽ նախկին նախագահն անդրադարձավ Նիկոլ Փաշինյանի ղեկավարությամբ տեղի ունեցած խորհրդակցությանը, որի ժամանակ քննչական մարմինների ներկայացուցիչների հետ քննարկվել է կալանքների հարցը։ Ըստ Վարդազարյանի՝ այդ խորհրդակցության մասին հաղորդագրությունը նսեմացնելու է ամբողջ դատական իշխանության գործունեությունը։ Վարդազարյանի խոսքով՝ քաղաքական իշխանություններն ընդհանրապես չպետք է խոսեն դատական իշխանության մասին։

Նշենք, որ Վարդազարյանն իր իրավունքները փորձում է վերականգնել ՄԻԵԴ-ում։ Դիտարկմանը, որ ՄԻԵԴ-ի կողմից ՀՀ-ն «քարտ բլանշ» ունի և, կարծես թե, ՍԴ դատավորների վերաբերյալ վճիռը հենց այդ շարքից է՝ Վարդազարյանն արձագանքեց՝ նշելով, որ ոչ թե կարծես, այլ՝ հենց այդ դաշտից է։ Իսկ թե արդյոք մտավախություն կա, որ իր և մյուս դատավորների իրավունքների խախտման վրա ևս ՄԻԵԴ-ն աչք կփակի, Վարդազարյանը նշեց՝ ենթադրելի է, որ նման բան կարող է լինել, բայց դա մտավախություն չէ, գործընթաց է, իսկ մտավախությունն այլ է, որ Արցախը հանձնեցին, անկլավներն էլ կհանձնեն, ադրբեջանցիները կգան՝ Հայաստանում բնակվելու։

«Դա մտավախություն է։ Իսկ թե այդ պրոցեսն ինչպես կընթանա՝ էական չէ։ Գործընթաց է, ինչ-որ մի պահի կկարգավորվի։ Միշտ վատ լինել չի կարող, մի օր էլ մեր փողոցում է տոն լինելու»,- ասաց նա։

Հեղինակ՝ Իզաբել Սահակյան

Աղբյուր` Փաստինֆո