Փաստ ինֆո

«ՔՊ»-ական պատգամավորներն ու ոչ պաշտոնական խոսնակները՝ մեկը մյուսին հաջորդելով գրառումներով են հանդես գալիս՝ թիրախավորելով Արցախի իշխանություններին և ընդդիմանալով Արցախի Հանրապետության պետական ինսիտիտուտների պահպանման ու, ընդհանրապես, Արցախի Հանրապետության գոյությունն ամրագրող Արցախի Հանրապետության հրամանագրին։

Հիշեցնենք, որ երեկ Արցախի նախագահ Սամվել Շահրամանյանի խորհրդականը նշել էր, որ Արցախը լուծարելու մասին հրամանագիրն այլևս գոյություն չունի, ինչի համար հիմք է հանդիսանում հոկտեմբերի 19-ի հրամանագիրը, համաձայն որի՝ հոկտեմբերի 1-ից Արցախի նախագահը, պետնախարարը, կառավարության անդամները, դատավորները, մարդու իրավունքների պաշտպանը, խորհրդարանը, անվտանգության խորհրդի քարտուղարը, իրավապահ մարմինները, Ստեփանափակերտի քաղաքապետն ու վարչական շրջանների ղեկավարները շարունակում են պաշտոնավարել՝ հասարակական հիմունքներով, այսինքն՝ առանց վարձատրության։

Այս հայտարարությունից հետո իշխանական քարոզչամեքենան՝ տարբեր «տրամաչափի» ՔՊ-ականներով հանդերձ, միմյանց հերթ չտալով, տարբեր հայտարարություններով են հանդես եկել՝ թիրախավորելով Արցախի իշխանություններին և նշելով, որ ՀՀ-ում երկրորդ հրամանագիր ստորագրող չի կարող լինել։

Նման գրառում է կատարել, օրինակ, ՔՊ-ական պատգամավորներ Արուսյակ Ջուլհակյանը և Արթուր Հովհաննիսյանը։
Ջուլհակյանը, մասնավորապես, նշել է․ «Լեռնային Ղարաբաղի հայաթափումից շաբաթներ առաջ նախագահ ընտրված Շահրամանյանի խորհրդականն այսօր Ազատության հետ զրույցում ասել է, որ Լեռնային Ղարաբաղի ինստիտուտները շարունակելու են գործել նաև հետագա տարիներին, քանի որ Շահրամանյանի՝ Ստեփանակերտի քաղաքապետի պաշտոնավարման շարունակությանն առնչվող հրամանագիրը փաստացի չեղարկել է Լեռնային Ղարաբաղի և դրա ինստիտուտների լուծարման մասին հրամանագիրը: Մի կողմ թողնենք այս պնդման իրավական ողջ անհեթեթությունը: Նախ, ըստ որոշ խելքի պուտուկների ԼՂ ինստիտուտները շարունակում են գործել, ապա գուցե իրենց վրա վերցնեն ՀՀ բանկերի նկատմամբ ունեցած Լեռնային Ղարաբաղի՝ 315 մլրդ ՀՀ դրամի չափով պարտքը, որն այսօր ՀՀ կառավարությունը ստիպված եղավ վերցնել իր վրա: Երկրորդ՝ ՀՀ տարածքում կա մեկ իշխանություն, ՀՀ՝ ազատ, արդար և թափանցիկ ընտրությունների միջոցով ընտրված օրինական իշխանությունները: ՀՀ տարածքում գործում են բացառապես ՀՀ ինստիտուտները: Եվ վերջապես դուք ձեր տկարամտությամբ (լավագույն դեպքում) Լեռնային Ղարաբաղը բերեցիք կործանման: Հույս չունենաք, որ նույնը կարողանալու եք անել Հայաստանի Հանրապետության հետ: Հայաստանը տեր ունի, որը ձեզ թույլ չի տալու նույն օյինը խաղալ մեր պետության/ հայրենիքի հետ: Հանգիստ նստեք տեղներդ»։ Նմանատիպ գրառում է կատարել նաև Արթուր Հովհաննիսյանը՝ նշելով․ «Փաստորեն, Արցախի կապիտուլյացիան ստորագրած, ամբողջ զինամթերքն ու տեխնիկան հակառակորդին նվիրած, Հայաստանին պատերազմի մեջ ներքաշելու փորձին նպաստած Արցախի նախագահը և յուր «պաշտոնյաները» նախ նեղսրտում են, որ Հայաստանում աշխատավարձ չեն ստանում, հետո էլ խոսում Հայաստանի Հանրապետության ներսում ինչ-որ ինստուտուտների գործարկման մասին:

Ո՞վ է Սամվել Շահրամանյանը, որ Երևանում հրամանագիր ստորագրի: Երևանում և Հայաստանում գործում են միայն և բացառապես ՀՀ օրինական ղեկավարության հրամանագրերն ու որոշումները:

Հայաստանի Հանրապետությունում իշխանությունը պատկանում է ժողովրդին, ժողովուրդը ընտրել է իր լեգիտիմ Ազգային ժողովին, Վարչապետին, ձևավորել ինստիտուտներ և վերջ: Հայաստանում կա մեկ իշխանություն և այդ մեկ իշխանությունը Հայաստանի օրինական իշխանությունն է:

Սրան հակադրվող կամ սրա դեմ պայքարող ցանկացած նախաձեռնություն դիտվելու է որպես հակապետական գործունեություն, հայտարարվելու է օրենքից դուրս և արժանանալու է ամենակոշտ միջոցներին պետության կողմից:
Հայաստանին նոր ռազմական սադրանքի մեջ ներքաշել ձգտողների բոլոր ծրագրերը ջարդուփշուր են լինելու, իսկ հեղինակները` խստագույնս պատժվելու են»։

Ի դեպ, հարկ է նշել, որ 2023 թվականի սեպտեմբերի 28-ին հրապարակված հրամանագիրը, թե, իբր, 2024 թվականի հունվարի 1-ից դադարում է իր գոյությունը, դեռ չի մտել իր գործողության մեջ եւ այն ստորագրած պաշտոնյան կարող է նաեւ այն չեղարկել։

Բացի այդ, Արցախի պետական ինստիտուտների գործունեության շարունակվելու մասին Սամվել Շահրամյանի հոկտեմբերի 19-ի հրամանագիրը ստորագրվել է հանուն Արցախի Հանրապետության ու հաստատվել Արցախի Հանրապետության նախագահի կնիքով եւ ոչ թե Հայաստանի։ Հետեւապես, ՔՊ-ականների բարձրացրած հիստերիան ուղղակի մատնում է դրանց ակունքն ու ստանձնար պարտավորությունները՝ ոչնչացված տեսնել հայկական երկրորդ պետությունը։

Աղբյուր` Փաստինֆո