Փաստ ինֆո

Գեղարքունիքի մարզում ձկնորսությամբ զբաղվող նորատուսցիների և պարեկների միջև տեղի ունեցած միջադեպի գործով ձերբակալված 26 ձկնորսներից 25-ն ազատ են արձակվել արգելանքից։ ՀՀ ՔԿ-ից «Փաստինֆո»-ի հետ զրուցում հայտնեցին այս մասին՝ նշելով, որ մեկ անձի ներկայացվել է մեղադրանք ՀՀ քրեական օրենսգրքի 452-րդ հոդվածի 4-րդ մասի 2-րդ կետով նախատեսված հանցավոր արարքը կատարելու համար (Պաշտոնատար անձի օրինական ծառայողական կամ քաղաքական գործունեությանը միջամտելը, որն իրականացվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ)։

ՔԿ փոխանցմամբ՝ դատարան միջնորդություն է ներկայացվել նրա նկատմամբ կալանքը որպես խափանման միջոց ընտրելու վերաբերյալ։

Հիշեցնենք, որ Գեղարքունիքում բավականին լարված իրավիճակ է։ Ձկնորսները բողոքի ակցիա էին իրականացնում՝ պահանջելով թույլ տալ իրենց ձուկ որսալ։ Իրավիճակն առավել լարվել է, երբ իրավապահները ծեծելով բերման են ենթարկել ձկնորսներին։ ՔԿ-ն իր հերթին է հաղորդագրություն տարածել՝ հայտնլով, թե դիմակավորված առերևույթ ձկնորսներն են ծեծել պարեկներին։ Մասնավորապես, ՔԿ-ն հայտնել էր 26 ձկնորսների ձերբակալության մասին։

«ՀՀ ՆԳՆ ոստիկանությունից 2023թ. դեկտեմբերի 19-ին ՀՀ քննչական կոմիտե ստացվել են հաղորդումներ և դրան կից փաստաթղթեր, համաձայն որոնց՝ 2023թ․ դեկտեմբերի 19-ին՝ ժամը 1240-ին, Ոստիկանության Գեղարքունիքի մարզի ջրային պարեկային ծառայության աշխատակիցները, «Սևան ազգային պարկ» ՊՈԱԿ-ի ծառայողների հետ, 2 նավակով ծառայություն են իրականացել Սևանա լճի Նորատուս բնակավայրի հատվածում։ Այդտեղ նրանց են մոտեցել մոտ 200 ձկնորսական նավակներ: Ըստ հաղորդման՝ դրանցում գտնվող դիմակավորված բազմաթիվ անձինք պարեկների և «Սևան ազգային պարկ» ՊՈԱԿ-ի նավերի վրա գտնվող անձնակազմի հասցեին հնչեցրել են հայհոյանքներ, սպառնացել են հրկիզել նրանց և նավերը, նրանց ուղղությամբ նետել են բենզինով լցված շշեր, փայտեր։ Ոմանց հաջողվել է բարձրանալ «Սևան ազգային պարկ» ՊՈԱԿ-ին պատկանող նավի վրա և վիճաբանել նավի վրա գտնվող աշխատակիցների հետ, ձեռքերով, ոտքերով, տարբեր առարկաներով հարվածել աշխատակիցներին, որոնցից մի քանիսը, նախնական տվյալներով, ստացել են տարբեր աստիճանի մարմնական վնասվածքներ:

Այդ ամենի ընթացքում պարեկային ծառայողները և ազգային պարկի աշխատակիցները նրանց հորդորել են դադարեցնել անօրինական գործողությունները և ենթարկվել իրենց օրինական պահանջներին։ Սակայն նավակներով մոտեցած անձինք շարունակել են ագրեսիվ գործողությունները, նրանցից մեկը դանակով կտրել է «Սևան ազգային պարկ» ՊՈԱԿ-ին պատկանող նավի հետնամասից կապված նավակին պահող պարանը և նավակը տարել: Պարեկային ծառայողների կողմից մոտ 2 կմ հետապնդվելուց հետո ձկնորսները հեռացել են:
Նույնաբովանդակ հաղորդում է ստացվել նաև «Սևան ազգային պարկ» ՊՈԱԿ-ի աշխատակիցների կողմից»,- նշված էր հաղորդագրությունում։
Ի․ Ս․

Աղբյուր` Փաստինֆո