Փաստ ինֆո

Կարեն Անդրեասյանին հաջողվել է այն, ինչը չի հաջողվել Գագիկ Ջհանգիրյանին՝ մեղմել դատավորների ըմբոստությունը։ ԲԴԽ նախկին նախագահ Ռուբեն Վարդազարյանը «Փաստինֆո»-ի տաղավարում համաձայնություն հայտնեց փորձագիտական համայնքի այդ գնահատականների հետ՝ նշելով․ «Քանի որ Կարեն Անդրեասյանն անգամներ ավելի խելացի է Գագիկ Ջհանգիրյանից։ Ջհանգիրյանն ուղղակի 90-ական թվականների այդ բիրտ ուժ կիրառելու գործիքն էր օգտագործում, Կարեն Անդրեասյանը գործիքների ամբողջ պալիտրան է օգտագործում և նրան հաջողվել է տոտալ իշխանություն հաստատել դատական համակարգում։ 5-10 տոկոս ըմբոստ դատավորներ են մնացել համակարգում, նույնիսկ այդքան չի հասնում։ Հազիվ թե 10 մարդ հավաքենք, որ ըմբոստ են մնացել, բայց վստահ եմ՝ նրանց ժամանակն էլ է գալու»։

Ավելին, Ռուբեն Վարդազարյանի դիտարկմամբ՝ ոչ միայն այդ 10 ըմբոստի լիազորություններն են դադարեցվելու և նրանք ենթարկվելու են քաղաքական հետապնդման, այլև՝ հերթը հասնելու է նաև իրենց կողմից նշանակված, «դրածո» դատավորներին, քանի որ երբ չկա ճնշում դատական իշխանության նկատմամբ, վախի մթոնոլորտ չկա, դատական իշխանությունը սկսում է լռելյայն անկախանալ, հետևաբար, այդ գործընթացը պետք է շարունակվի․ «Եթե ըմբոստներից ազատվեն, անցնելու են սեփականներին, չէ՞, այլևս մարդ չի մնա համակարգում»։

Իսկ թե արդյո՞ք այդ «դրածո» դատավորները չեն գիտակցում, որ վաղ թե ուշ իրենց հերթն էլ է գալու՝ Վարդազարյանը նշեց, որ այդտեղ պետք է փորձագիտական հանրության ակտիվ աշխատանքը, որ կարողանան ցույց տալ՝ «հարգելի դատավորներ, որքան էլ այս պահին անվտանգ եք, վաղն իշխանությունը փոխվելուց հետո բոլորդ ենթարկվելու եք քրեական պատասխանատվության»։ Վարդազարյանը նաև խոստանում է ավարտել այն պրոցեսը, որ բոլոր այն դատավորները, որոնք իր գործով թույլ են տվել օրենքի խախտումներ, ենթարկվելու են քրեական պատասխանատվության՝ ՔՕ 3-4 հոդվածով, սկսած՝ Վճռաբեկ դատարանի նախագահից, որը Վարդազարյանի գնահատմամբ, եղել է պարագլուխը։
Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո