Փաստ ինֆո

ՀՀ բանկային համակարգը ինչպես 2020 թ-ի պատերազմից առաջ, այնպես էլ դրանից հետո պահպանել է ներկայացվածությունը Լեռնային Ղարաբաղում՝ նպաստելով ԼՂ բնականոն գործունեությանը։ Այս մասին ՀՀ ԱԺ արտահերթ նիստում ներկայացնելով 2023 թ-ի պետական բյուջեի մասին օրենքում լրացումներ կատարելու մասին նախագիծն, ասաց ՀՀ ֆինանսների նախարար Վահե Հովհաննիսյանը։

Նա հայտնեց, որ 2020 թ-ից հետո ԼՂ-ի՝ ՀՀ կառավարության կողմից աջակցությունը թույլ է տվել սպասարկել ՀՀ ֆինանսաբանկային հանդեպ պարտավորությունները, որոնց մի մասը ձևավորվել էր նաև պատերազմի հետևանքով։

«ԼՂ կառավարության և վերջինիս կողմից ստեղծված հիմնադրամների, ԼՂ իրավաբանական և ֆիզիկական անձանց վերակառուցման ենթակա պարտավորությունները ՀՀ ֆինանսաբանկային համակարգի հանդեպ 2023 թ-ի դեկտեմբերի 29 -ի դրությամբ կկազմեն շուրջ 315 մլրդ դրամ, որոնց գերակշիռ մասի սպասարկումը ԼՂ-ի շուրջ իրավիճակի պատճառով անհնար է դարձել։ Նշվածն առաջ է բերում մի շարք ռիսկեր, այդ թվում՝ ՀՀ ֆինանսաբանկային համակարգի կապիտալի էական կորուստներ և ֆինանսական համակարգի կայության խաթարում, բանկերի վարկանիշների էական վատթարացում, տնտեսության ֆինանսավորման անկում, հետևաբար, տնտեսական ակտիվության նվազում։

Ստեղծված իրավիճակը նաև հանգեցրել են ԼՂ բնակչության վարկունակության անկում՝ ստեղծված սոցիալ տնտեսական ծանր պայմաններում»։

Նա նշեց, որ նախագծով առաջարկվում է ստեղծված շուրջ 315 մլրդ դրամ պարտավորությունների չափը վերակառուցել ՀՀ կառավարության և ֆինանսական կազմակերպությունների միջև՝ 70 և 30 տոկոս համամասնությամբ։ «Ընդ որում ՝ ՀՀ կառավարության կողմից ստանձնվող 70 տոկոսի չափով կառավարությունը կթողարկի պետական գանձապետական պարտատոմսեր՝ ձեռք բերելով վերակառուցվող ամբողջ պարտավորության նկատմամբ պահանջի իրավունքը։ Սա հնարավորություն կտա էապես մեղմել ՀՀ բանկային համակարգի համար ստեղծված ռիսկերը»։

Նա նշեց, որ սրանով նախատեսվում է վերականգնել նաև ԼՂ բնակչության առանձին խմբերի վարկունակությունը և հնարավորություն ստեղծել հետագայում իրենց գործունեությունը ծավալելիս ֆինանսական համակարգում գործարքներ կատարելիս՝ խոչընդոտների չհանդիպել։

ՀՀ Աժ փոխխոսնակ Հակոբ Արշակյանն անդրադառնալով նախագծին՝ ասաց, որ մտահոգություններ կան, որ միջոցները, որոնք ծախսվել են Լեռնային Ղարաբաղում՝ դրանց մի մասը կարող են այլ նպատակներով ծախսած լինել։ «Մասնավորապես, Հայաստանում կամ արտերկրում, այդ իմաստով ես ցանկանում եմ իրավապահների ուշադրությունը գրավել և ընթացս բացահայտված դեպքեր ունենալու դեպքում՝ հօգուտ ՀՀ -ի բռնագանձել նման միջոցները»։

Նախարարն արձագանքեց, որ այս օրենքը հենց դա էլ նախատեսում է, որ ամբողջ պարտավորության գումարի՝ 315 մլրդ դրամի նկատմամբ ՀՀ-ն ստանում է պահանջի իրավունքները։ «Մենք կարողանալու ենք հետագայում գնալ այդ գումարների հետևից, եթե բացահայտվեն որոշակի խնդրահարույց դեպքեր՝ մենք կարողանանք այդ գումարի պահանջ ներկայացնել»։

Աղբյուր` Փաստինֆո