Փաստ ինֆո

Երեք ամիս առաջ իշխանությունները Երևանի ավագանու ընտրություններին մասնակցեցին «Ասեք՝ կանենք» կարգախոսով, բայց նոր տարուց առաջ Ամանորյա նվեր են մատուցում երևանցիներին, որ ինչ իրենք ասեն՝ ժողովուրդն անի։ Այս մասին այսօր մեկնարկած իրազեկման ակցիայի ընթացքում լրագրոցների հետ զրույցում ասաց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը։

«Այս տոտալ, համատարած թանկացումները որպես Ձմեռ պապիկի նվեր են մատուցելու երևանցիներն։ Բացի այն, որ ընտրություններից 3 օր անց Արցախում պատերազմ սկսվեց ու Արցախն հայաթափվեց, մի քանի ամիս անց էլ գործող իշխանությունները վերջնականապես ցույց տվեցին իրենց իրական դեմքն առ այն, որ թեև ասում են, որ ժողովուրդը թալանի մատերիալ չէ, իրականում պատրաստվում են օրենքի անվան տակ մտնել ժողովրդի գրպանը։ Թանկացնելու են և կարմիր գծերի վճարները, և հարկեր-տուրքերն են բարձրացնելու, օրինակ, մասնավոր գերեզմանատների և ստորգետնյա ավտոկայանատեղիների վերաբերյալ համատարած թանկացումներ են իրականացնելու»։
Նա նշեց, որ իրենց խմբակցությունը փորձելու է հանրային մթնոլորտ գեներացնել՝ կանխելու այն թանկացումները, որոնք իշխանությունները դեկտեբերի 26-ի նիստի օրակարգ են բերելու։

«Այս պահին ոչ իշխանական ֆրակցիաների միակ գործիքը այդ նիստին քվորում չապահովելն է մենք փորձելու ենք կիրառել այդ գործիքը։ Եթե պարզվի, որ 3 խմբակցությունների բոյկետ չկա, ապա «Մայր Հայաստանը» տեղում է բացատրելու և տորպեդահարելու, որ իշխանությունը մտադիր է մտնել երևանցու գրպանը և քաղաքը դարձնել սեփական քմահաճույքների էպիկենտրոն»։

Նշենք, որ այսօրվանից «Մայր Հայաստան» խմբակցությունը Երևանում իրականացնելու է իրազեկման ու բողոքի ակցիաներ, որոնք լինելու են ամենօրյա և իրականացվելու են մայրաքաղաքի տարբեր հատվածներում:

Այսօրվա ակցիան մեկնարկել է Սարյանի պուրակից: «Մայր Հայաստան» խմբակցության ավագանու անդամները ՀՀ քաղաքացիներին մանրամասն տեղեկացնեն, թե ինչ նոր ֆինանսական բեռ է ավելացվում ավտովարորդների ու բիզնեսով զբաղվողների համար:

Կներկայացվեն թանկացումներն ու թալանը կանխելու համար իրականացվելիք միջոցառումները:

Աղբյուր` Փաստինֆո