Փաստ ինֆո

Ադրբեջանի հետ ինչ խաղաղության պայմանագրի մասին է խոսքը, երբ նրանց զորքը Հայաստանի սահմաններից ներս է, հետ չեն քաշվում, հայտարարում են, որ հետ չեն էլ քաշելու, հստակություն չեն մտցնում, չեն ասում, թե ինչ քարտեզներով են սահմանազատումն անելու, չեն ճանաչում ՀՀ 29 800 քկմ-ն, այսինքն՝ իրենք հայտարարում են, որ մնալու են այնտեղ, որտեղ կանգնած են, դա է իրենց սահմանը։ «Փաստինֆո»-ի հետ զրույցում նման արձանագրում է արել ՀՀ պաշտպանության նախկին նախարար, ՀՀ ԱԺ «Հայաստան» խմբակցության ղեկավար Սեյրան Օհանյանը։

Հիշեցնենք, որ օրեր առաջ Ադրբեջանի արտգործնախարար Բայրամովը հայտարարել էր, որ անընդունելի է համարում զորքերը հետ քաշելու հայկական կողմի առաջարկը, քանի դեռ չի կատարվել սահմանների դելիմիտացիան։ Մինչդեռ, Ադրբեջանն օկուպացրել է ՀՀ ինքնիշխան տարածքից ավելի քան 200 քկմ տարածք եւ հատկապես Գեղարքունիքում, Սյունիքում զբաղեցրել են այնպիսի բարձունքներ, որտեղից ամբողջությամբ վերահսկողության տակ են պահում սահմանամերձ բնակավայրերը, հողատարածքներն ու ցանքատարածքները։

Սեյրան Օհանյանը որպես ռազմական գործիչը հասկանալի է համարում զորքերը հետ չքաշելու մասին Ադրբեջանի հայտարարությունը, քանի դեռ չկա երկարաժամկետ խաղաղության պայմանավորվածություն։
«Այդուհանդերձ, Բայրամովը մի բան պետք է հասկանա, որ իրենք Հայաստանի դիրքերում են, մոտ 200 քկմ զբաղեցրել են և իրենք ուզեն, թե չուզեն՝ սահմանզատման, սահմանագծման շրջանակում պետք է իրենց զորքերը հետ քաշեն»,- նշել է Ս.Օհանյանը։

Դիտարկմանը, թե Բայրամովի հայտարարությունն արդյոք չի վկայում այն մասին, որ Ադրբեջանը չի ճանաչում Հայաստանի 29 800 քկմ-ն և այդ պայմաններում ինչպե՞ս ենք մենք խաղաղության պայմանագիր ստորագրելու՝ Օհանյանն ասաց, որ խաղաղության պայմանագրի կնքման համար անհրաժեշտ են որոշ պայմանները, որոնք այսօր բացակայում են։

«Նախ՝ խաղաղություն ոչ թե պետք է մուրալ, այլ պետք է գնալ արժանապատիվ խաղաղության կամ պարտադրել այդ խաղաղությունը։ Այսօր այդ խաղաղության պայմանագիրը, կարծում եմ, հիմք է խաղաղության խաբկանքի։ Այսինքն՝ Ադրբեջանն ու Թուրքիան մեզ մոլորեցնում են։

Երկրորդ՝ ինչպես կարելի է խաղաղության գնալ մի երկրի հետ, որը հռետորաբանությունը չի փոխել։ Իրենք շարունակում են ճնշումները հայ ժողովրդի և Հայաստանի վրա։ Ակնհայտ է, որ իրենք պայմանագրունակ պետություն չեն, սկսած արցախյան հակամարտության բոլոր պայմանավորվածություններից՝ շարունակած 2020 թ-ի 44-օրյա պատերազմով, Նոյեմբերի 9-ի հայտարարության կետերի պահանջների կատարմամբ, ապա նաև այն բոլոր գործողութունները, որոնք իրականացրել են Հայաստանի սահմաններում, ապա նաև Արցախի հայաթափմամբ։ Ըստ էության, իրենք հանցագործություն կատարեցին՝ ցեղասպանություն կատարեցին Արցախի նկատմամբ, այս պայմաններում ինչպե՞ս կարելի է ձեռք մեկնել, ասել մենք ուզում ենք խաղաղ ապրել, հատկապես, որ իրենց ռազմատենչ հայտարարությունները չեն փոխվել։

Ավելին, իրենք Հայաստանի սահմաններում են, հետ չեն քաշվում այդ սահմաններից, հայտարարում են, որ հետ չեն էլ քաշվելու, հստակություն չեն մտցնում, չեն ասում, թե ինչ քարտեզներով են սահմանազատումն անելու, չեն ճանաչում 29 800 քկմ-ն, այսինքն, իրենք հայտարարում են, որ մնալու են այնտեղ, որտեղ կանգնած են, դա է իրենց սահմանը։ Այս իրավիճակում, ես կարծում եմ, որ շատ դժվար է գնալ խաղաղության պայմանագրի վերջնական կնքմանը։

Բոլորն են խաղաղություն ցանկանում, բայց այս պայմաններում խաղաղության գնալը՝ անչափ դժվար է լինելու»։

Աղբյուր` Փաստինֆո