Փաստ ինֆո

Հայաստանի և Ադրբեջանի սահմանազատման հանձնաժողովների հաջորդ հանդիպման վերաբերյալ դեռևս պայմանավորված ժամկետներ չկան: Այս մասին այսօր լրագրողների հետ զրույցում նշեց ՀՀ փոխվարչապետ Մհեր Գրիգորյանը:

Անդրադառնալով սահմանազատման հանձնաժողովի նախօրեին հաստատաված աշխատակարգին՝ նա նշեց, որ այն նկարագրում է, թե ինչպես են երկրների հանձնաժողովները աշխատանքային նիստեր և հանդիպումներ կազմակերպելու:

«Դուք գիտեք, որ մենք ունենք սահմանազատման հանձնաժողով, և ադրբեջանական կողմն ունի նման հանձնաժողով: Մեր աշխատանքների տրամաբանությունն այն է, որ տեղի է ունենում հանձնաժողովների հանդիպում: Մենք ճիշտ համարեցինք, որ կանոնակարգենք այդ աշխատանքի ընթացքը, մասնավորապես, երբ ենք հանդիպում, որտեղ ենք հանդիպում, ոնց ենք կազմում արձանագրությունը, ինչ լեզվով ենք խոսում և այլն: Խոսելու ենք անգլերեն կամ ռուսերեն, երկուսն էլ հնարավոր է»:

Նրա դիտարկմամբ՝ սահմանազատման և սահմանագծման գործընթացը բավականին երկար կտևի, որովհետեւ դա բավականին բարդ գործընթաց է։

Դիտարկմանը, որ աշխատակարգում նշվել է, որ հանդիպում կարող են ունենալ նաեւ երրորդ երկրում, փոխվարչապետը հիշեցրեց, որ նման բան արդեն եղել է. «Մի հանդիպում ունեցել ենք Բրյուսելում, մեկ անգամ էլ Մոսկվայում»:

Հարցին, թե ո՞ր քարտեզներով է իրականացվելու սահմանազատումը, փոխվարչապետը պատասխանեց. «Մենք բազմիցս հայտարարել ենք, որ մեզ համար որպես մեկնարկային քարտեզ ընդունում ենք 1975-1990 թվականների ամենաթարմ քարտեզները, բայց ուզում եմ հստակեցնել, որ աշխատելու ենք բացառապես տոպոգրաֆիկ, պրոֆեսիոնալ քարտեզներով և նաեւ պետք է աշխատենք բացառապես փաստաթղթերով, որոնք ունեն իրավական նշանակություն:

Ամեն դեպքում՝ չեմ կարող բացառել, որ հանձնաժողովի աշխատանքը լինելու է տարիներով աշխատանք: Մենք աշխատանքն այսպես ենք պատկերացնում. Հանձնաժողովների հանդիպումների ժամանակ կողմերից ամեն մեկը իր կողմից ներկայացնում է քարտեզ կամ քարտեզի հատված, իրավական փաստաթղթեր, որոնք նկարագրություն ունեն, կամ որևէ կարգավորում ունեն սահմանի, և սկսվում է քննարկում, մտքերի փոխանակում այդ փաստաթղթի և այդ տոպոգրաֆիկ քարտեզի վերաբերյալ: Բնականաբար, դա պետք է արվի հատված առ հատված»։

Նշենք, որ Ադրբեջանի արտգործնախարարը երեկ հայտարարել է, թե իրենց զորքերը հետ չեն քաշելու ՀՀ ինքնիշխան տարածքից, քանի դեռ դելիմտացիան չի ավարտվել։ Ասել է թե՝ շարունակելու են օկուպացրած պահել ՀՀ ինքնիշխան տարածքի շուրջ 250 քկմ տարածքը։

Աղբյուր` Փաստինֆո