Փաստ ինֆո

Ադրբեջանի դիրքորոշումները պարբերաբար փոփոխվում են, միշտ չէ, որ դրանք քարի վրա գրած են լինում։ Այս մասին «Փաստինֆոյի» հետ զրույցում ասաց ՀՀ ԱԺ արտաքին հարաբերությունների մշտական հանձնաժողովի անդամ Էդուարդ Աղաջանյանը՝ անդրադառնալով Ադրբեջանի ԱԳՆ Ջեյհուն Բայրամովի հայտարարությանը, որ ՀՀ օկուպացրած տարածքներից իրենց զորքը չեն պատրաստվում հետքաշել, դա համարելով անընդունելի։

Հիշեցնենք, սահմանագծից զորքերի հետ քաշման վերաբերյալ բանակցությունների կարեւորության մասին նախօրեին հերթական անգամ հայտարարել էր ՀՀ ԱԳՆ Արարատ Միրզոյանը։

Հարցին, թե արդյոք Բայրամովի դիրքորոշումը չի ենթադրում, որ Ադրբեջանը չի ճանաչում Հայաստանի տարածքային ամբողջականությունը՝ 29 800 քկմ սահմաններով՝ Աղաջանյանը պատասխանեց, որ կարծում է, թե դեռ վաղ դատողություններ անել։ «Պետք է գործընթացները որոշ ժամանակ զարգանան և, ըստ այդ՝ շատ բան պարզ կլինի, դիրքորոշումներն էլ հնարավոր է փոփոխվեն, այդ թվում՝ զորքերի հետ քաշման հարցի շուրջ»։

Դիտարկմանը, թե ինչը կարող է ազդել տեսակետի նման փոփոխութան վրա՝ Աղաջանյանն ասաց, որ նույն տրամաբանությամբ, երբ խոսում էինք գերիների վերադարձի մասին, Ադրբեջանի դիրքորոշումը կայանում էր նրանում, որ այդ 32 հոգին, կամ նրանցից առնվազն 26-ը, որ գերեվարվել էին Խծաբերդից՝ տեռորիստներ են և պետք է դատվեն իրենց օրենքով։ Բայց այդ մարդիկ վերադարձել են, չէ՞։ Գործընթաց է, պետք է աշխատենք նաև այդ ուղղությամբ»։

Նման պայմաններում արդյոք մինչև սահմանազատման գործընթացի ավարտը խաղաղության պայմանագրի ստորագրման մասին խոսակցությունները վաղաժամ չեն՝ Աղաջանյանն ասաց, որ այդ հարցին կդժվարանա պատասխանել։ «Այս պահին նման գնահատականներ չեմ կարող տալ»։

Աղբյուր` Փաստինֆո