Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, շարունակվում է Ազատ գյուղի զորամասի զինվորական կացարանում 15 զինծառայողի կյանք խլած հրդեհի գործով դատական նիստը։

Նշենք, որ այսօրվա նիստում շարունակվեց տուժող Լևոն Խառատյանի հարցաքննությունը, որը նախորդ նիստին չէր ավարտվել։ Մինչ հարցաքննությունը, սակայն, տուժողների իրավահաջորդներից մեկը՝ Նարեկ Ավագյանի մայրը՝ Քնարիկ Պետրոսյանը, արձագանքեց Լևոն Խառատյանի՝ նախորդ նիստում արված հայտարարությանը, թե Նարեկը կոնֆլիկտներ է ունեցել, այդ թվում նաև՝ թմրանյութեր պատվիրելու և օգտագործելու հարցերի շուրջ ու պնդեց, որ որդին 10 տարեկանից սպորտսմեն է․տարբեր եվրոպական քաղաքներում մրցույթների է մասնակցել։

«Ես չգիտեմ, բանակ զորակոչվելուց մեկ տարի հետո ի՞նչն է փոխվում, երբ մեկ սիգարետ անգամ չծխած տղան դառնում է թմրանյութ պատվիրող: Չգիտեմ՝ դա բանակ է, թե՞ ինչ: Չնայած, չեմ զարմանում, նման սպաների դեպքում հնարավոր է ամեն ինչ: Հնարավոր է, որ դա սպաների համար է պատվիրված եղել»,- ասաց Նարեկի մայրը՝ ավելացնելով, որ թեեւ հասկանում է, որ Լևոնը ցանկանում է ճշմարտությունն ասել, բայց այդ ճշմարտությունը կարող էր սկսել հենց իրենից՝ պատմեր, թե ում հետ է խնդիրներ ունեցել, այլ ոչ թե Նարեկից։ Մայրը վստահեցրեց, որ Նարեկը երբեք ոչ մեկի հետ խնդիր չի ունեցել։

Հարցաքննության ընթացքում տուժողը շարունակեց պնդել, որ հրդեհը փորձել է հանգցնել բաճկոնով, գոռացել, սակայն չկոնկրետացրեց՝ արդյո՞ք իրեն պատասխանել են, թե ոչ, ինչու մուտք չի գործել սենյակ և սենյակում փորձել արթնացնել զինծառայողներին, արդյո՞ք հրդեհը հնարավոր կլիներ հանգցնել բաճկոնով, եթե ոչ, ապա ինչու է բաճկոնով փորձել հանգցնել։

Ցուցմունքում նա նաև անդրադարձավ Նարեկի մոր դիտարկմանը, որ կոնֆլիկտների մասին խոսելիս պետք է ինքն իրենից սկսի և հայտնեց, որ վեճ է ունեցել՝ կապված «բուշլաթ» ձեռք բերելու հետ, իսկ իր ունեցած հաճախակի միգրենների համար հարց էր բարձրացվել իրեն զորամասից տեղափոխելու։ Տուժողների ներկայացուցիչ Նորայր Նորիկյանը հայտնեց, որ պատրաստվում են համապատասխան փուլում միջնորդել տուժողի նախաքննական ցուցմունքները հրապարակել՝ էական անհամապատասխանության հիմքով։

Տուժողը, որը հրդեհի հետևանքով առողջական խնդիրներ ունի, պարբերաբար նշում է, որ չի հիշում, ինչն էր տուժողների իրավահաջորդների զայրույթն առաջացնում։ Դատական նիստերի դահլիճում իրավիճակը հատկապես կրկին լարվեց, երբ դատավորը սահմանափակեց ծնողների՝ հարցեր տալը։ «Բոլորիդ կասկածում եմ՝ վարչապետից մինչև զինվոր. սպանեցիք երեխեքին»,- ասաց ծնողներից մեկը։

Լարված իրավիճակով պայմանավորված դատական նիստն ընդմիջվեց, իսկ վերսկսումից հետո՝ դատարանում քննարկման առարկա դարձվեց գործով կալանքի տակ գտնվող ամբաստանյալների խափանման միջոցի փոփոխման հարցը։ Դատարանը որոշեց Եղիշե Հակոբյանի, Գոռ Աղեկյանի, Մառլեն Սարգսյանի խափանման միջոց կալանքի ժամկետը երկարացնել։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո