Փաստ ինֆո

Երեկ հայրենադարձված 32 գերիների մի մասն արդեն հարցաքննվում է, նրանք, հիմնականում, տուժողի դատավարական կարգավիճակ ունեն։ Այդ մասին «Փաստինֆո»-ին հայտնել է ՀՀ քննչական կոմիտեի նախագահի մամուլի քարտուղար Գոռ Աբրահամյանը՝ նշելով, որ վերադարձած գերիների հիմնական մասը 2020թ. ագրեսիվ պատերազմին վերաբերող վարույթով ունեն տուժողի կարգավիճակ։

«Մի քանիսը պատերազմից հետո շփման գծի տարբեր հատվածներում տեղի ունեցած գերեվարումների դեպքերով քննվող վարույթներով են անցնում որպես տուժող։ Բոլորի հետ անհրաժեշտ քննչական գործողություններն էլ իրականացվելու են համապատասխան վարույթներով»,- նշեց Աբրահամյանը՝ հավելելով, որ այլ տեղեկատվություն այս պահին հնարավոր չէ տրամադրել նախաքննական գաղտնիքից ելնելով։

Հիշեցնենք, որ երեկ Ղազախ-Իջևան սահմանագոտում գերիների փոխանակում է տեղի ունեցել, որի ընթացքում Ադրբեջանում պահվող գերիներից 32-ը վերադարձվել են ՀՀ, իսկ ՀՀ-ում դատապարտված ադրբեջանցի երկու զինծառայողը հանձնվել են Ադրբեջանին։

Հայրենադարձված գերիների ցուցակում չի եղել լիբանանահայ Վիգեն Էուլջեքջյանը, որի անունը դեռևս դեկտեմբերի 7-ին ներառված էր ՀՀ վերադարձող գերիների ցուցակում, որը հրապարակել էին ադրբեջանական ԶԼՄ-ները։ Հայրենադարձված գերիներից 31 ՀՀ զինծառայողներ են, մեծամասամբ՝ շիրակցիներ, որոնք գերեվարվել են 2020թ 44-օրյա պատերազմից անմիջապես հետո՝ Խծաբերդի և Թաղավարդի շրջանում։

Իսկ մեկը Արցախի զինծառայող է, որը գերեվարվել էր այս տարվա սեպտեմբերին։

Վերադարձած գերիների թվում են նաեւ ՀՀ ինքնիշխան տարածքից գերեվարված անձինք, այդ թվում՝ պահեստազորային Գագիկ Ոսկանյանը, որը գերեվարվել է վարժանքների ընթացքում։ Հայրենադարձված գերիները երեկ՝ վերադարձից անմիջապես հետո բուժզննում են անցել զինվորական հոսպիտալում։ Ինչպես հայտարարել է ՀՀ առողջապահության նախարար Անահիտ Ավանեսյանը՝ գերիները բուզննումից հետո բժշկական կենտրոններ չեն տեղափոխվել։

Հեղինակ՝ Իզաբել Սահակյան

Աղբյուր` Փաստինֆո