Փաստ ինֆո

Դատախազը պահանջում է մեղավոր ճանաչել ՀՀ երրորդ նախագահ Սերժ Սարգսյանին առաջադրված մեղադրանքում և ազատել քրեական պատասխանատվությունից՝ վաղեմության ժամկետներն անցած լինելու հիմքով։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության քրեական դատարանում՝ դատավոր Վահե Միսակյանի նախագահությամբ, այսօր կայացել է ՀՀ երրորդ նախագահ Սերժ Սարգսյանի և մյուսների գործով դատական նիստը։ Գործը գտնվում է ավարտական՝ դատական վիճաբանությունների, փուլում։ Ճառով առաջինը հանդես եկավ մեղադրանքի կողմը։

Դատախազ Արմեն Մուրադյանը, հրապարակելով մեղադրական ճառը, նշեց, որ դատարանում հետազոտված ապացույցները բավարար են՝ ամբաստանյալի մեղքը հաստատված համարելու համար։ Դատախազը միջնորդեց մեղավոր ճանաչել Սերժ Սարգսյանին, Բարսեղ Բեգլարյանին, Գևորգ Հարությունյանին՝ առաջադրված մեղադրանքներում և ազատել քրեական պատասխանատվությունից՝ վաղեմության ժամկետներն անցած լինելու հիմքով, խափանման միջոցները թողնել անփոփոխ՝ մինչև դատավճռի՝ օրինական ուժի մեջ մտնելը, միևնույն ժամանակ, պահպանել մեղադրյալների գույքի վրա դրված արգելանքը՝ մինչև քաղաքացիական հայցի լուծումը, բավարարել քաղհայցը՝ նրանցից բռնագանձելով շուրջ 489.160.310 ՀՀ դրամ։

Պաշտպանության կողմը ճառն այսօր չհրապարակեց։ Փոխարենը՝ Սերժ Սարգսյանի պաշտպան Ռուբեն Հակոբյանը միջնորդություն ներկայացրեց՝ նրա նկատմամբ ընտրված խափանման միջոց չհեռանալու մասին ստորագրությունը վերացնելու մասին։ Դատախազ Արմեն Մուրադյանն առարկեց՝  նշելով, որ որևէ փաստական տվյալներ ի հայտ չեն եկել՝ խափանման միջոցի կիրառման անհրաժեշտությունը վերանալու վերաբերյալ, այն  պիտանի  և անհրաժեշտ է՝ նկատի ունենալով նաև նախորդ նիստում մեղադրյալների այն դիրքորոշումը, որով նրանք առարկել են վաղեմության հիմքով քրեական հետապնդումները դադարեցնելուն։

Դատարանը հեռացել է խորհրդակցական սենյակ՝ խափանման միջոցը վերացնելու մասին միջնորդության վերաբերյալ որոշում կայացնելուց, որից հետո դատական նիստը կհետաձգվի՝ մինչև դեկտեմբերի 28-ը։

Հիշեցնենք, որ քրեական գործով կա 3 մեղադրյալ։ Սերժ Սարգսյանից բացի մեղադրանքներ են առաջադրվել նաեւ նախկին  փոխնախարար Սամվել Գալստյանին, գործարար Բարսեղ Բեգլարյանին։ Ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Հեղինակ՝ Իզաբել Սահակյան

Աղբյուր` Փաստինֆո