Փաստ ինֆո

«Զրոյական կետ» արտահայտությունը նախորդիվ մեզ համար ունեցել է շատ վատ հետևանքներ, բայց ես չգիտեմ, թե հիմա ինչ է նշանակում Փաշինյանի ասած՝ «զրոյական կետը»։ Այս մասին «Փաստինֆոյի» հետ զրույցում ասաց քաղաքագետ Թևան Պողոսյանն՝ անդրադառնալով Նիկոլ Փաշինյանի այսօր արված հայտարարությանը, թե գերիների վերադարձը կարելի է համարել զրոյական կետ՝ Հայաստանի և Ադրբեջանի միջև խաղաղության պայմանագրի շուրջ բանակցային գործընթացի համար։

Հիշեցնենք, որ ավելի վաղ՝ նախքան 2020 թվականի 44-օրյա պատերազմը, Փաշինյանը հայտարարել էր, որ ԼՂ հակամարտության կարգավորման բանակցություններն ինքն սկսում է իր զրոյական կետից, եւ այսօր Արցախը օկուպացված է թշնամու կողմից։ Դեկտեմբերի 14-ին Փաշինյանը խոսել է զրոյական կետի մասին՝ արդեն հայ-ադրբեջանական բանակցությունների համատեքստում։

«Ինձ դժվար է հասկանալ, թե դա ինչ է նշանակում, գուցե այն, որ մենք ունեցել ենք 2 ձերբակալած ադրբեջանցի դիվերսանտ, մարդասպան, որոնց հետ փոխանակել ենք 32-ին, հիմա էլ ասում են՝ մեզ մոտ զրո է։ Իսկ մնացած հայերը, որ մնացել են Բաքվի բանտերում՝ իրենց դիմաց ոչ մի բան չունենք տալու, որ հետ բերենք, դե զրոյացել ենք, միգուցե սա նկատի ունի»,- նշեց Թեւան Պողոսյանն ու ավելացրեց. «կարո՞ղ է զրոյացվում են այն տարածքները, որոնք Ադրբեջանը օկուպացրել է, 250 քկմ զրոյացվո՞ւմ է, մոռանո՞ւմ ենք դրանց մասին, թե՞ Արցախի հայերի իրավունքներն են զրոյացվում, էլ չե՞նք խոսելու դրանց մասին, որովհետև զրոյական կետ է։ Ինչ ասես կարելի է հասկանալ այդ հայտարարության տակ»։

Դիտարկմանը, թե օրերս ՔՊ-ական պատգամավոր Սարգիս Խանդանյանը հայտարարել էր, որ բանակցությունների ռուսական հարթակից հրաժարվում են, քանի Վաշինգտոնում և Բրյուսելում կան պայմանավորվածություններ, որոնք Մոսկվա գնալու դեպքում կարող են զրոյացվել և իրենք ստիպված են լինելու բանակցությունները սկսել զրոյական կետից։ Այսինքն՝ մի դեպքում դեմ են զրոյական կետին, մյուս դեպքում իրենք դա նախաձեռնում՝ Պողոսյանն արձագանքեց, թե արդյո՞ք առաջին անգա՞մ է, որ ՔՊ-ականների հայտարարությունները միմյանց հակասում են։

«Մեկն ասում է՝ Տիգրան Մեծի ժամանակ են Արցախը հանձնել, մյուսն ասում է 1991-ին են հանձնել, երրորդը՝ 1996-ին, չորրորդը՝ 2016-ին, հինգերորդը՝ 2018-ին ու այսպես շարունակ։ Կամ լրագրողներդ պիտի հարց չտաք նրանց կամ էլ պետք է հասկանալ, որ երբ նույն թիմի անդամները շաբաթը մեկ մեկնաբանություն են փոխում՝ ուրեմն միշտ էլ ունենալու ենք այս խառնաշփոթը, պարզապես պետք է անլուրջ վերաբերվել այդ հայտարարություններին»,- նշել է Թեւան Պողոսյանը։

Ըստ նրա՝ իրականում այս ամենի մեջ որևէ իմաստ չկա, որովհետև, եթե իմաստ լիներ, ապա ժողովրդավար ցանկացած իշխանություն նախեւառաջ իր առջև պիտի դներ իր նախընտրական ծրագիրը, եւ հրաժարական տար՝ այն իրականացնել չկարողանալու համար։

«Իրենց այդպիսի զրոյական կետ եմ մաղթում, որ իրենք մի անգամ, օրինակ, վաղը արթնանան, իրենց 2021 թ-ի նախընտրական ծրագիրը դնեն իրենց առջև ու ասեն՝ կներեք ժողովուրդ, ինչ- որ մի բան սխալ ենք արել, սկսում ենք զրոյական կետից կյանքի կոչել մեր նախընտրական ծրագիրը, այդպիսի զրոյական կետ եմ մաղթում իրենց»,- եզրափակեց Պողոսյանը։

Աղբյուր` Փաստինֆո