Փաստ ինֆո

Գյուղում մարդիկ ուրախ են, միայն ընտանիքները չէ, բոլորս ենք սպասում տղաներին, հիմա դրսում շատ ցուրտ է, բայց ամբողջ գյուղը դրսում է, հավաքվել ենք, տղաներին ենք սպասում։ Այս մասին «Փաստինֆոյի» հետ զրույցում ասաց Զույգաղբյուր գյուղի նախկին ղեկավար Ավետիք Ամիրյանը։

Նշենք, որ այսօր Ադրբեջանից վերադարձած 32 հայ ռազմագերիների մեջ են նաև այս համայնքի 4 բնակիչ Սերոբ Ավագյանը, Վաղարշակ Ավետիսյանը, Արման Դիլանյանը և Գեղամ Սերոբյանը։

Ամիրյանը նշեց, որ համայնքը փոքր է, բոլորն իրար ճանաչում են, շատերը միմյանց հետ նաև բարեկամական կապեր ունեն։

«Տղաներից երեքը 40 -ին մոտ են, միայն Վաղարշակն է փոքր՝ 27-28 տարեկան է։ Նրանցից երկուսն ամուսնացած են, Գեղամն ու Արմանը երեխաներ էլ ունեն, երկուական երեխաներ ունեն, հիմա ամենաշատը նրանք են սպասում։ Տղաների գերեվարումից հետո՝ ընտանիքներ ոչ մի օր չեն դադարել սպասել, ոնց կարող էինք չսպասել, եթե ընտանիքիդ անդամը դուրսն է՝ ոնց չես սպասի»,- նշեց մեր զրուցակիցը։
Ամիրյանն ասում է՝ անցած 3 տարիներին տղաների հետ կապը մշտապես եղել է, «Կարմիր խաչի» օգնությամբ հաճախ էին զանգում։ «Ասում էին՝ լավ են, դե հո ուրիշ բան չէին ասելու։ բայց գիտեմ, որ անգամ կարողացել են Կարմիր խաչի միջոցով իր փոխանցել։ Տղաներն ասում էին՝ նորմալ հասել է տեղ»։

Նա նաև պատմեց, որ բոլորի ընտանիքներն էլ սովորական գյուղի առօրյայով ապրող ընտանիքներ են։ «Պատերազմ էր սկսվել՝ գնացել էին, կարծեմ, ոչ մեկը ոչ բարձրագույն կրթություն ունի, ոչ էլ զինվորական է։ Պատերամը նրանց ընտանիքների համար 3 տարի ձգվեց։ ամենաբարդը սպասումի վերջին օրերին էին, երբ անունները հրապարակվել էին, գիտեինք, որ գալու են, բայց չկային, անհանգիստ էինք, որ ինչ-որ բան կարող է փոխվել, դե, էս երկրում ոնց կարող է անհանգիստ չլինենք։ Թշնամին է, սովորական հարևան չէ, որ կարող էր մտադրությունը փոխել, որ փոխեց՝ ինչ կարող ես անել»։

Աղբյուր` Փաստինֆո