Փաստ ինֆո

Հայկական ֆուտբոլում իրավիճակն աղետալի է։ Վերջին տարիներին «Փյունիկի» նկատմամբ բացահայտ հետապնդումներ են իրականացվում այն բանի համար, որ մենք սկսել ենք մեր կարծիքը հայտնել։ Այս մասին այսօր հրավիրված մամուլի ասուլիսի ժամանակ ասաց «Փյունիկ» ֆուտբոլային ակումբի նախագահ, սեփականատեր Արթուր Սողոմոնյանը։

Նա նշեց, որ անցած տարի «Փյունիկին» զրկել են տեխնիկական կենտրոնի մարզադաշտերում մարզվելու հնարավորությունից, չնայած այն պատկանում է ՀՖՖ-ին, ոչ թե մասնավոր անձանց ու իրենք ունեն նույն իրավունքները, ինչ ՀՖՖ մյուս անդամները։

«Այս տարի մեզ զրկեցին «Հանրապետական» մարզադաշտում խաղեր անցկացնելու հնարավորությունից , ինչը նույնպես անհասկանալի է։ Կարծում եմ, սա անձնական ամբիացիաների հարց է, դրանից հետո մեզ զրկեցին բոլոր դաշտերից, եթե «Շիրակ» ակումբը չլիներ՝ մենք առհասարակ չէինք մասնակցի այս առաջնությանը։ Մեզ ուզում են դուրս մղել հայկական ֆուտբոլից»,- ասել է մարզիչը՝ ավելացնելով, որ իր նկատմամբ արդեն մեկ տարի է դատական պրոցես է ընթանում։ «Մելիքբեկյան ինձ դատի է տվել ու մեկ տարվա ընթացքում ես այդպես էլ չհասկացա, թե ինչի համար»։

Նրա դիտարկմամբ՝ միակ հնարավորությունը դեկտեմբերի 23-ի ՀՖՖ նախագահի ընտրությունն է և ղեկավարության փոփոխությունը։ «Հետևաբար ես կայացրել եմ որոշում, որև մեզ համար շատ ցավոտ է, բայց ես ստիպված եմ անել այս հայտարարությունը, եթե ղեկավարության փոփոխություն չլինի, ՀՖՖ նախագահը մնա Արմեն Մելիքբեկյանը, «Փյունիկը» չի մասնակցի հաջորդ տարվա Հայաստանի առաջնությանը և ես կհեռանամ ֆուտբոլից, քանի որ իմաստ չեմ տեսնում։

Այո, մեր ակումբը՝ «Փյունիկը», հաջող ելույթների արդյունքում այժմ Հայաստանի առաջնության մրցաշարային աղյուսակում գտնվում է առաջին հորիզոնականում, սակայն շատ բարդ է այս առաջնությանը անվանել արդար առաջնություն, այս արդյունքը մեր կամքի ու նյարդերի հաշվին է։ Մենք չենք ցանկանում մասնակցել հայկական ֆուտբոլի ոչնչացմանը»,- ասել է նա։

Աղբյուր` Փաստինֆո