Փաստ ինֆո

Կա բանակցությունների որոշակի տրամաբանություն, արդեն որոշակի գործընթաց է տեղի ունեցել և այդ գործընթացի տրամաբանության շարունակականության ապահովումը շատ կարևոր է։ Այս մասին խորհրդարանական ճեպազրույցների ժամին ասաց ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ անդրադառնալով ռուսական կողմից հնչող հայտարարություններին, թե Հայաստանը խուսափում է ռուսական հարթակներում բանակցություններից։

«Խաղաղության համաձայնագրի քննարկումները արդեն իսկ նախորդիվ ժամանակահատվածում ընթացել են, սա է պատճառը, որ Հայաստանը նշում է, որ կա արդյունավետության հարց, մասնավորապես, գիտենք, որ Վաշինգտոնում մի քանի ռաունդով բանակցություններ են տեղի ունեցել՝ ԱԳՆ-ների մակարդակով, Բրյուսելում են երկրների ղեկավարների մակարդակով տեղի ունեցել բանակցություններ, որտեղ համաձայնեցվել են սկզբունքային հարցերը՝ ակնկալվելիք խաղաղության համաձայնագրի շուրջ։ Շատ կարևոր է, որ այս գործընթացները շարունակվեն և կրկին չվերադառնանք զրոյական կետի և նորից սկսվեն սկզբունքային հարցերի շուրջ քննարկումները»,- ասաց Խանդանյանը։

Ըստ նրա՝ հայկական կողմը միշտ պատրաստ է բանակցությունների և վերջին ամիսներին մենք տեսնում ենք, որ Ադրբեջանն է խուսափում բանակցություններից և չի մասնակցում դրանց։ «Մեր ակնկալիքն այն է մեր գործընկերներից, որ նրանք կարողանան ստիպել Ադրբեջանին և բերել բանակցությունների սեղանի շուրջ»։

Հարցին, թե հաշվի առնելով Նոյեմբերի 9-ի փաստաթղթի ճակատագիրը՝ որքանով է հայկական կողմը վստահում ռուսական հարթակին՝ Խանդանյանն ասաց, որ դա լեգիտիմ մտահոգություն և հարցադրում է՝ հաշվի առնելով այն համգամանքը, որ Նոյեմբերի 9-ի փաստաթղթի իրականացման երաշխավորը ռուսական կողմն էր։

«Ցավոք, այսօր մենք մի իրավիճակում ենք հայտվել, որ նոյեմբերի 9-ի հայտարարության կետերը՝ կապված ԼՂ հայերի անվտանգության, Լաչինի միջանցքի հետ՝ խափանվել են, հետևաբար այդ լեգիտիմ մտահոգությունը մնում է»։

Խմբակցության քարտուղար Արթուր Հովհաննիսյանն էլ ասաց, որ Նոյեմբերի 9-ի հայտարարություն կար, բայց հողի վրա ինչ տեղի է ունեցել՝ տեղի է ունեցել բոլորիս աչքի առաջ, թե վստահությունը, թե տրամադրվածությունը բխում են այդ իրողություններից։ «Իսկ արդեն հարթակների հետ կապված՝ մենք միշտ նշել ենք, որկարևոր է, որ սկզբունքները պահպանվեն, իսկ սկզբունքները նշել ենք. տարածքային ամբողջականության ճանաչում, ճանապարհների ապաշրջափակում՝ երկրների սուվերեն իրավազորության ներքո»։

Աղբյուր` Փաստինֆո