Փաստ ինֆո

ԱԺ 8-րդ գումարման 6-րդ նստաշրջանի վերջին ճեպազրույցն անց է կացվում Հայաստանի և Արցախի համար չափազանց ողբերգալի և նվաստացուցիչ պայմաններում։ Ողջ աշխարհը պետք է իմանա, որ Ադրբեջանի կողմից իրականացված հանցագործ քաղաքականության պատճառով 2022թ-ի դեկտեմբերին սկսած Արցախի 10-ամսյա շրջափակումն ավարտվեց ևս մեկ կեղծ ապօրինի հակաահաբեկչական գործողությամբ, որի արդյունքում Արցախի ժողովրդի նկատմամբ իրականացվեց ցեղասպանություն՝ տեղահանմամբ։ Այս մասին ԱԺ-ում ճեպազրույցների ժամանակ ասաց «Հայաստան» խմբակցության ղեկավար Սեյրան Օհանյանն՝ ընդգծելով, որ ՀՀ իշխանությունների անգործությամբ, կրավորական կեցվածքով Արցախը ոչ միայն հանձնվեց, այլև հայաթափվեց և 150 000 հայ անտուն է մնացել ու գտնվում է Հայաստանում։

«Այսօր ավելի կործանարար իրավիճակ է, քանի որ ՀՀ իշխանությունները չունեն և հրաժարվում են որևէ ծրագիր կամ ռազմավարություն մշակել Արցախի ապագայի համար, փաստորեն նրանք հրաժարվում են Արցախից»,- արձանագրել է Սեյրան Օհանյանը։
Նա դիտարկմամբ՝ այսօր պետք է շարունակել Արցախի համար պայքարը, քանի որ հակամարտությունն ավարտված չէ, այն ավելի է խորացել և Ադրբեջանի հանցագործ գործունեությունն ավելի է սրվել։

«Արցախը եղել է գործոն և այսօր դրա սուբյեկտայնության պահպանման համար բոլոր ինստիտուտները պետք է գործեն՝ ներառյալ ժողովրդի հետագա ճակատագրի և հետ վերադարձի պայմանների ստեղծման հարցի լուծման համար։ Այս պարագայում բանակցությունները միջազգային նոր պայամաններում և ձևաչափով այլընտրանք չունեն։ Այս ռազմավարության պատասխանատուն Հայաստանի և Արցախի հանրապետությունների իշխանություններ են, հատկապես Հայաստանի իշխանությունենրը, որոնք իշխանության գալու առաջին օրից իրենց վրա վերացրել են այդ պատասխանատվությունը, իսկ հիմա սահուն կորպով այդ պատասխանատվությունը գցում են Արցախի իշխանությունների վրա»։

Նա ընդգծեց, որ «Խաղաղության պայմանագիրը» խաղաղություն չի բերելու, այդ փաստաթուղթը լինելու է շատ անորոշ ձևակերպումներով, որը Ադրբեջանին հնարավորություն կտա սեփական մեկնաբանություններով պատերազմի առիթ ստեղծել։
Հարցին, թե արդյոք հասունացել է խաղաղության պայմանագրի ստորագրման պահը՝ խմբակցության պատգամավոր Արթուր Խաչատրյանն ասաց, որ չի հասունացել։ «Ադրբեջանը ցանկացած զիջումից հետո նոր զիջումներ է առաջ բերում»։
Դիտարկմանը, թե Ալիևն ասում է, որ որևէ խոչընդոտ չկա պայմանագրի ստորագրման համար՝ նա պատասխանեց, որ դա նշանակում է, որ հայկական կողմը բոլոր պահանջների առաջ ընկրկել է, բայց ես կարծում եմ, որ 17 օրվա ընթացքում որևէ պայմանագիր չի ստորագրվի։

Օհանյանն էլ ընդգծեց, որ խաղաղության խաբկանքի հետևից պարտադրված գնալը վկայությունն է Ադրբեջանից և միջազգայի հարթակից Հայաստանի իշխանությունների վրա շարունակ գործադրվող ճնշումների։ «Ադրբեջանի հռետորաբանությունը չի փոխվել, նրանց գործունեությունը ՀՀ տարածքում, առավել ևս Արցախի տարածքում՝ չի փոխվել Արցախի ցեղասպանությունից հետո ինչպե՞ս կարելի է ձեռք մեկնել ցեղասպանին և գնալ խաղաղության»։

Աղբյուր` Փաստինֆո