Փաստ ինֆո

Ինչու է մեղադրողն առարկում, որ Գագիկ Խաչատրյանը բուժում ստանա, վիրահատվի, ինչու է պայքարում, որ հենաշարժողական խնդիրներ ունեցող անձը կալանավորվի, մինչդեռ, ՔԿՀ-ում խնամքի ինստիտուտ գոյություն չունի, անձը պետք է միայնակ սնվի, սանհանգույցից օգտվի, տեղաշարժվի։ Սա «մարդկային» վերաբերմունք է։ Այս մասին ՊԵԿ նախկին նախագահ Գագիկ Խաչատրյանի կալանավորման միջնորդության քննարկման ժամանակ հայտարարեց նրա պաշտպան Երեմ Սարգսյանը։

Ինչպես արդեն տեղեկացրել ենք՝ Երևանի ընդհանուր իրավասության քրեական դատարանում՝ դատավոր Արթուր Մկրտչյանի նախագահությամբ, շարունակվում է ՊԵԿ նախկին նախագահ Գագիկ և Կարեն Խաչատրյանների գործով դատական նիստը։ Հանրային մեղադրող Գևորգ Սարգսյանը միջնորդել է Գագիկ Խաչատրյանի նկատմամբ որպես խափանման միջոց կիրառել կալանավորումը։ Նշենք, որ ՊԵԿ նախկին նախագահ Գագիկ Խաչատրյանն այսօր դատարան է ներկայացել ստացիոնար բուժհաստատությունից՝ շտապօգնության ուղեկցությամբ, դատական նիստին մասնակցում է անվասայլակով։ Փաստաբանը հիշեցրեց, որ դատախազը նախկինում երբևէ չի բարձրացրել բացակայությունների՝ անհարգելի լինելու հարց, սակայն այսօր միջնորդում է կալանավորել՝ իբրև անհարգելի բացակայությունների համար։ Ի դեպ, փաստաբանը նշեց, որ նախկինում, երբ հնարավորություն էր տրվում Գագիկ Խաչատրյանին արտերկրում բուժում ստանալու, վիրահատվելու, Խաչատրյանի՝ բուժումը ստանալուց հետո վերադառնալուց հետո գործի քննությունն ընթանում էր բնականոն հունով։

«Որ էդքան անհանգստացած էիք էս գործով, ինչի՞ էիք առարկում, որ Գագիկ Խաչատրյանը բուժում ստանա, որ էս վիճակին հասնի, գաք, ասեք՝ անհարկի ձգձգո՞ւմ են»,- ասաց փաստաբան Երեմ Սարգսյանը՝ դիմելով դատախազին։

Նշենք, որ հանրային մեղադրողը կալանավորման միջնորդությունը ներկայացնելիս բարձրացրել էր նաև Գագիկ Խաչատրյանի առողջական վիճակի վերաբերյալ փաստաթղթերը՝ կասկածի տակ դնելով նաև դրանց՝ իրականությանը համապատասխանությունը, դատախազն ակնարկել է, որ Գագիկ Խաչատրյանն այս ընթացքում ստացիոնար բուժում չի ստացել, բժիշկը նրան տանն է այցելել։

Փաստաբան Երեմ Սարգսյանը, սակայն, նախ նկատեց՝ Գագիկ Խաչատրյանի առողջական վիճակի վերաբերյալ փաստաթղթեր են ներկայացվել նաև առողջապահության նախարարությունից, իրենց ևս՞ չեն վստահում, ապա հիշեցրեց՝ նախկինում երբևէ դատախազը չի ասել, որ բժշկական փաստաթղթերը կեղծ են։ Դատախազի նման միջնորդությունը պաշտպանը որակեց որպես «խայտառակություն», ընդգծեց՝ չի կասկածում դատախազի պրոֆեսիոնալիզմին, եթե այդ միջնորդությունն իրապես նա է գրել, ապա չի բացառվում անգամ կարգապահական պատասխանատվության հարցով գլխավոր դատախազություն դիմելը։ Պաշտպան Երեմ Սարգսյանը միջնորդեց՝ համակցության մեջ քննարկել Գագիկ Խաչատրյանին արտերկրում վիրահատվելու թույլտվություն տալու մասին ավելի վաղ ներկայացված միջնորդությունը և որոշել՝ Գագիկ Խաչատրյանը պետք է մեկնի վիրահատության, թե՝ ուղարկվի ՔԿՀ։

Հիշեցնենք, որ Գագիկ Խաչատրյանը և Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։

Ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ» ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված «Հիդրոապարատ» ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ: Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո