Փաստ ինֆո

Չեմ կարծում, որ Ալիևն այնքան միամիտ է, որ համաձայնում է 32 գերի ազատել ադրբեջանական բանտերից՝ ստանալով ընդամենը երկու ադրբեջանցու։ Ընդ որում, Հայաստանում գտնվող ադրբեջանցիները շարքային զինծառայողներ էին, այլ ոչ թե՝ բարձրաստիճան զինվորականներ, հետևաբար, դժվար թե նրանց ազատության համար Ադրբեջանը նման քայլի գնար։ Այս մասին «Փաստինֆո»-ի եթերում ասել է միջազգայնագետ Գրիգոր Բալասանյանը։

Նշենք, որ Հայաստանն Ադրբեջանին է հանձնելու ՀՀ ինքնիշխան տարածք ապօրինի ներխուժած և ՀՀ տարածքում ՀՀ քաղաքացու՝ ԶՊՄԿ պահնորդի սպանության համար դատապարտված ադրբեջանցի երկու զինծառայողներին։ Գրիգոր Բալասանյանը, սակայն, ուշադրություն է հրավիրում այն հանգամանքին, որ Ադրբեջանը դժվար թե համաձայներ երկու ադրբեջանցի զինծառայողի փոխարեն 32 գերի վերադարձնել Հայաստան, ըստ այդմ, միջազգայնագետը հարց է բարձրացնում, թե ինչու է Ադրբեջանն ընդամենը երկու գերիով բավարարվում և ինչ ենք դրա դիմաց տալու Ադրբեջանին։ Բալասանյանը դա պայմանավորեց մի քանի հնարավոր բացատրությամբ, նախ՝ հիշեցրեց, որ Ադրբեջանի հետ մինչ այդ ուղիղ կերպով բանակցում էր ԱՄՆ-ն և անձամբ Էնթոնի Բլինքենն էր համակարգում այդ բանակցությունները։

«Բլինքենն իր ներկայացուցչին էր ուղարկել Ադրբեջան՝ Ադրբեջանի հետ բանակցությունները վերականգնելու և հետ հուն բերելու համար։ Որոշ փորձագետներ նշում են, որ հենց այդ բանակցությունների արդյունքում է Ադրբեջանը համաձայնել գնալ այս քայլին։ Բացի այդ, Հայաստանը և Ադրբեջանը պայմանավորվել են միջազգային կազմակերպություններում պաշտպանել մեկը մյուսի թեկնածությունը և անգամ, եթե Հայաստանն առաջադրում է թեկածու, Ադրբեջանն է հանում, եթե Ադրբեջանն է առաջադրում, Հայաստանն է հանում։ Նման բան չի եղել երբևէ, սա աննախադեպ երևույթ է հայ-ադրբեջանական հարաբերություններում և հանկարծակի նման հարաբերությունների կարգավորում կամ փորձ՝ չենք հիշում, բայց այս ամենը շատ արագ է տեղի ունենում, հետևաբար, չնայած հայտարարությանը, որ ուղիղ բանակցություններ են եղել, ամեն դեպքում այդ ուղիղ բանակցությունները եղել են միջնորդավորված»,- ասաց Բալասանյանը՝ նշելով, որ ամեն դեպքում՝ 32 հայ վերադառնում է, թե ինչ կլինի հետագայում՝ դեռևս չի խոսվում, բայց ամեն դեպքում, բանակցությունների ինտենսիվ փուլը շարունակվելու է։

Աղբյուր` Փաստինֆո