Փաստ ինֆո

Արարատի մարզպետարանի աշխատակիցները հերթական անգամ փափուկ բարձ դրեցին գլխներիս տակ, ասացին՝ կառավարությանն առաջարկ ենք ներկայացնելու, որպեսզի գոնե մինչև Ամանոր թույլ տան, որ Արարատի մարզի մսի խանութներն աշխատեն առանց մսի՝ սպանդանոցային մորթի վերաբերյալ հավաստագրի, բայց մինչև այսօր որևէ պատասխան չենք ստացել։
Այս մասին «Փաստինֆոյի» հետ զրույցում ասաց Մրգավետ գյուղի բնակիչ, ֆերմեր Կարեն Կիրակոսյանը, որն օրեր առաջ մասնակցում էր Արտաշատ-Երևան ճանապարհին իրականացված ֆերմերների բողոքի ակցիային։

Նա պատմեց, որ Մրգավետի համայնքապետարանում հանդիպում է տեղի ունեցել սպանդանոցների ղեկավարների, ֆերմերների, փոխմարզպետների հետ, բայց իրենց խնդիրների լուծման պատասխան դեռ չկա։

«Այս պահին էլ գրեթե չենք կարողանում աշխատել, խանութս գրեթե դատարկ է, հիմա տավարի միս չունեմ։ Վաղվանից մորթը սկսելու եմ, մորթելու եմ ու անհամբեր սպասելու եմ, որ սանէպիդկայանից գան, տեսնեմ, ի՞նչ են ասելու։ Իրենց ասելու եմ՝ արի գնանք իմ ֆերմա, հետո էլ ձեր ասած սպանդանոց, տեսնենք, որտեղ է ավելի մաքուր»։

Նա նշեց, որ Արարատի մարզի միակ սպանդանոցը Բաղրամյան գյուղում է։ «Սպանդանոց ասելը լավ է, ստանդանոց չէ, խոզանոց է, ես ինքս էդտեղի միսը չեմ վաճառի, բայց մարդիկ են եղել՝ դիմել են ասել են՝ անասուն բերենք, մորթեք, ասել են մեր կենդանիներին ենք մորթում, ժամանակ չունենք։ Ես իմ հաճախորդին էդ կարգի միս չեմ էլ վաճառի, բայց եթե անգամ դիմեմ՝ չեն կարողանալու մատակարարել։ Միայն մեր գյուղում մսի 8 խանութ կա, պատկերացրեք, թե ամբողջ Արարատի մարզում, որքան կարող է լինել, առջևում էլ նոր տարի է, եթե անգամ մեջտեղից ճղվեն՝ չեն հասցնելու»։

Ֆերմերը պատմեց, որ մյուս մարզերում էլ իրավիճակը գրեթե նույնն է։ «Ընկեր ունեմ, Արմավիրի մարզում է, ինքն էլ էր բողոքում։ Ասում է՝ ճիշտ է, 2-3 սպանդանոց կա մարզում, բայց նախ չեն հասցնում, բերած միսն էլ հաճախ հետ են վերադարձնում։ իսկ մեր մոտ ավելի ավելի վատ է վիճակը։ Միակ սպանդանոցն ուղիղ իմաստով խոզանոց է, անունը դրել են սպանդանոց։ Անգամ լրագրողներին թույլ չեն տվել նկարել, ասել են՝ չի կարելի։ Ուղղակի չեն ուզում ցույց տալ, թե ինչ վիճակ է, 1 կիլոմետրից արդեն անտանելի հոտ է տարածվում, մոտենալ չի լինում։ Պատկան մարմիններն էլ շատ լավ տեղյակ են վիճակից, բայց թե ոնց են թույլ տալիս , որ այդտեղից միս դուրս գա՝ չգիտեմ»։

Կիրակոսյանն ասաց, որ եթե առաջիկա 1-2 օրերի ընթացքում պատասխան չլինի, կամ պատասխանն իրենց չբավարարի՝ քայլերի են դիմելու։ «Էսպես չի կարող լինել, ես օրական խանութի վարձ, հոսանքի համար եմ վճարում, հարկեր եմ տալիս։ Օրական 10-12 հազար դրամ վնաս եմ ունենում, եթե էսպես շարունակվի՝ քայլերի ենք դիմելու»։

Աղբյուր` Փաստինֆո