Փաստ ինֆո

Ես կխուսափեմ վերադարձվող գերիների անունները հնչեցնել, քանի որ շատ զգայուն թեմա է, մինչև գերիները չհատեն ՀՀ պետական սահմանը, նաև լրատվամիջոցներին խորհուրդ կտայի չշրջանառել անուններ, որովհետեւ հասկանում եք՝ ինչքան բարդ կարող է սա լինել գերիների հարազատների համար:

Այս մասին այսօր ԱԺ-ում լրագրողների հետ զրույցում ասաց ԱԺ արտաքին հարաբերությունների հանձնաժողովի նախագահ Սարգիս Խանդանյանը՝ անդրադառնալով նախօրեին Հայաստանի և Ադրբեջանի տարածած համատեղ հայտարարությանը:

Ինչպես արդեն տեղեկացրել ենք՝ Ադրբեջանի նախագահի ու Հայաստանի վարչապետի աշխատակազմերի միջեւ տեղի ունեցած ուղիղ բանակցությունների արդյունքում ձեռք է բերվել պայմանավորվածություն, որ Ադրբեջանն ազատ կարձակի 32 հայ զինծառայողների, իսկ Հայաստանի Հանրապետությունն իր հերթին ազատ է արձակում 2 ադրբեջանցի զինծառայողների, այդ թվում մարդասպանին, որը ներխուժել էր ՀՀ տարածք ու սպանել ԶՊՄԿ պահնորդին։ Գերիների վերադարձի պայմանավորվածության մասին հայտնել է ՀՀ կառավարությունը, իսկ Ադրբեջանն էլ հրապարակել է անունները՝ նշելով, որ գերեվարված Արցախի ռազմաքաղաքական ղեկավարությունը չի հանձնվելու։

Խանդանյանի փոխանցմամբ՝ գերիների վերադարձը պետք է տեղի ունենա շատ մոտ ժամանակահատվածում, ժամերի կամ օրերի հարց է։ Նա նաև հայտնեց, որ փոխանակումը տեղի է ունենալու Հայաստանի և Ադրբեջանի սահմանին ։

Խանդանյանը հաստատեց, որ գերիների փոխանակման շրջանակում ադրբեջանական կողմին կփոխանցվի «Զանգեզուրի պղնձամոլիբդենային կոմբինատի» պահնորդին սպանած և ՀՀ-ում ցմահ դատապարտված ադրբեջանցի զինծառայողը։

Բանակցությունները երկկողմ ձևաչափով են եղել, ապա արդյոք սա սկիզբ է դնում երկկողմ ձևաչափով բանակցություններին՝ նա ընդգծեց, որ հարցը վերաբերում է հումանիտար խնդրի և հնարավորություն է առաջացել այդ ձևաչափում այս զգայուն հարցը բանակցել և լուծել։
«Սա շատ կարևոր հարց է, պետք չէ այս հայտարարությունը թերագնահատել, բայց նաև պետք չէ գերագնահատել։ Այն, ինչ Հայաստանը շարունակ ասել է՝ շարունակում է պնդել, այն է՝ խաղաղության համաձայնագրի շուրջ բանակցությունները պետք է տեղի ունենան այն սկզբունքների շուրջ, որոնց կողմերը համաձայնություն են տվել այս հուլիսին՝ եռակողմ հանդիպման ընթացքում»։

Փաստենք, որ Ադրբեջանն անգամ պաշտոնապես հաստատված բոլոր գերիներին չի վերադարձնում, թեեւ Հայաստանը նրան է հանձնում անգամ մարդասպանին։ Պաշտոնապես հաստատված գերիների թիվը 55-ն է, որից միայն 32-ին է Ադրբեջանը վերադարձնում։ Ոչ պաշտոնական տվյալներով՝ Ադրբեջանում գերեւարված է եւս 80 անձ, որոնց տվյալները Բաքուն դեռ պաշտոնապես չի հաստատել։

Աղբյուր` Փաստինֆո